Երևանի «Բիձու գյոլ» տարածքում կառուցվել է մարզահրապարակ
Հրազդանի կիրճում մեկնարկել են շինարարական աշխատանքները։ Դրանք ընթանում են ինչպես գետի հենապատի, այնպես էլ «Բիձու գյոլ» հատվածներում։ Վերջին անգամ հենապատը վերանորոգվել է 2010 թվականին։
Մենք Հրազդանի կիրճում ունեինք դարավոր խնդիրը․ հենապատի ջրերը գալիս և լցվում են, ասֆալտը քանդում։ Մենք հիմա հիմնանորոգում ենք անում՝ այսինքն՝ լուծում ենք տալիս՝ խողովակներով այդ ջուրը տեղափոխում ենք գետ։ Ընդհանուր առմամբ՝ գետի երկայնքով եղած հեղեղատարը մաքրում ենք ու վերանորոգում։ Կարծում եմ՝ այս երկու օրը կչորանա ու այդ հատվածում ասֆալտ կարվի, — հայտարարել է Պետրոս Պետոյանը։
«Բիձու գյոլ» կամ «Չռիկ» անվամբ հատվածում ավարտվել է լողավազանի վերականգնումն ու հանդերձարանի կառուցումը։ Լճի վերրևի հատվածում մարզասարքեր են տեղադրվել և նախատեսվում է նաև այդ հատվածում տեղադրել ռետինե հատակներ։ Տարածքի երթևեկությունը կառավարելու համար կտեղադրվեն լուսացույցներ։ Տարածքում լույսը ապահովելու համար տեղադրվել են արևային վահանակներ։
Նշենք նաև, որ մայրաքաղաքի կենտրոնական հատվածով անցնող Հրազդան գետի և դրա վրա կառուցված Երևանյան լճի աղտոտումը կանխելու նպատակով Երևանի քաղաքապետարանի կողմից իրականացվել է 2 աղբաորսիչ ցանցերի կառուցում։