Հայաստանը արձագանքել է Բաքվից հնչող ապատեղեկատվություններին
Մարտի 16-ից 18-ն ընկած ժամանակահատվածում Ադրբեջանը արդեն 6 հաղորդագրություն է տարածել՝ Հայաստան–Ադրբեջան սահմանին Հայաստանի բանակի կողմից իբրև թե հրադադարի ռեժիմի խախտումների մասին։ Վարչապետի աշխատակազմից հայտնում են, որ ստուգողական աշխատանքներ են իրականացվել և հերքվել են այդ հայտարարությունները։
ՀՀ պաշտպանության նախարարության 2025 թվականի մարտի 17-ի հաղորդագրության մեջ արձանագրվել է, որ ՀՀ պաշտպանության նախարարությունը պատրաստ է հետաքննել Ադրբեջանի հաղորդագրությունները հիմնավորող փաստերը՝ դրանք ՀՀ-ին փոխանցելու պարագայում։ Արձանագրում ենք, որ այս պահի դրությամբ Ադրբեջանի Հանրապետության կողմից Հայաստանի Հանրապետությանը չի փոխանցվել ՀՀ բանակի կողմից հրադադարի ռեժիմի խախտման ոչ մի փաստական տվյալ կամ հիմնավորում։ ՀՀ բանակը հրադադարի ռեժիմի խախտման պատճառ կամ հրահանգ չունի։
Չնայած կողմերի միջև խաղաղության պայմանագրի տեքստը համաձայնեցվել է արդեմ, այնուամենայնիվ դրանից հետո Ադրբեջանը սկսեց ապատեղեկատվություն տարածել։ Դրան արձագանքել էին նաև ԵՄ դիտորդական առաքելությունից, հայտարարելով, որ իրավիճակը սահմանին խաղաղ և կայուն է։
Փաշինյանի աշխատակազմը հաստատել է, որ Ադրբեջանին առաջարկել է բացել Մեղրիի երկաթուղին՝ Ադրբեջան-Հայաստան-Նախիջևան կապը ապահովելու համար։
Անհրաժեշտ ենք համարում արձանագրել նաև, որ 2025 թվականի հունվարին Հայաստանի Հանրապետությունը գրավոր կերպով Ադրբեջանի Հանրապետությանն է փոխանցել Ադրբեջանի արևմտյան շրջաններից Հայաստանի Հանրապետության տարածքով դեպի Նախիջևանի Ինքնավար Հանրապետություն, հակառակ ուղղությամբ և դեպի երրորդ երկրներ, և Հայաստանի Հանրապետության հյուսիս–արեւմտյան շրջաններից Ադրբեջանի տարածքով դեպի ՀՀ հարավային հատված, հակառակ ուղղությամբ և դեպի երրորդ երկրներ երկաթուղային բեռնափոխադրումների խնդրի լուծման առաջարկ, ինչպես նաև սպառազինությունների փոխադարձ վերահսկման երկկողմ մեխանիզմի ստեղծման մասին առաջարկ և սպասում է Ադրբեջանի դրական արձագանքին։
Փաշինյանը ևս մեկ անգամ հիշատակել է իր՝ 2024 թվականի հունիսի 22-ի առաջարկը՝ հրադադարի ռեժիմի խախտման դեպքերի և/կամ նման տեղեկությունների հետաքննության Հայաստան-Ադրբեջան համատեղ մեխանիզմ ստեղծելու մասին, որին Ադրբեջանը մինչև օրս դրական չի արձագանքել։
Ի՞նչ կարող են նշանակել Ադրբեջանի այս հայտարարությունները, դժվար է գուշակել։