Ազգային ժողովում քննարկվել է դեղերի որակի ու անվտանգության ստուգման խնդիրը

Ազգային ժողովի հերթական նիստում առողջապահության հարցերի մշտական հանձնաժողովը անդրադարձել է դեղերի հասանելիության և որակի ստուգման խնդիրներին։ Անկախ դեղատների ասոցիացիայի նախագահ Արթուր Խաչատրյանը կարծիք է հայտնել, որ Հայաստանում դեղերի օրինական հասանելիության հարցը չլուծելու դեպքում շարունակվելու է մաքսանենգ և չգրանցված ճանապարհով դեղերի շրջանառությունը: Արթուր Խաչատրյանը անդրադարձավ նաև օրենսդրական կարգավորումներին։  

Անհրաժեշտ է ուսումնասիրել ԵԱՏՄ միասնական գրանցամատյանի ցանկը, և քանի որ այդ դեղերը գրանցվում են նույն նորմատիվային կարգով, ինչպես ՀՀ-ում, պետք է ԵԱՏՄ միասնական գրանցամատյանում ճանաչել նաև այն դեղերը, որոնք անհրաժեշտ են ՀՀ բնակչությանը:

Արթուր Խաչատրյանի գնահատմամբ՝ ՀՀ-ում դեղերի որակի լաբորատոր փորձաքննությունը պետք է դարձնել պարտադիր՝ հաշվի առնելով նախկին իրավական փորձը:

Այս հարցին ի պատասխան, առողջապահության նախարար Անահիտ Ավանեսյանը նշեց, որ պարտադիր չէ, որ դեղի փորձաքննությունն իրականացնի դեղերի փորձագիտական կենտրոնը, այն իրականացնում է ներմուծողը՝ հիմնվելով իր ներքին փորձաքննությունների վրա: Բայց որքանո՞վ է ներքին փորձաքննությունը արդար և ազնիվ իրականացվում այդ ամենը վերահսկող մարմնի բացակայության դեպքում, հայտնի չէ։

Անահիտ Ավանեսյանը տեղեկացրել է, որ նախատեսվում են փոփոխություններ դեռեւս 2016 թվականին ընդունված «Դեղերի մասին» օրենքում:

Ձեռք բերված պայմանավորվածության համաձայն՝ նիստի մասնակիցներն առաջիկայում կներկայացնեն գրավոր առաջարկներ, որոնք անհրաժեշտ օրենսդրական փոփոխությունների հիմք կարող են հանդիսանալ:

Սեդա Մարտոյան