Պետությունը կաջակցի շահույթ չապահովող հեռուստաբովանդակությանը
Հայաստանում հիմնադրվելու է «Հանրօգուտ մեդիամիջավայր» անունով հիմնադրամ։ Նախաձեռնությունն ստացել է կառավարության հավանությունը ապրիլի 17-ի նիստում։
Ինչպես հայտարարեց բարձր տեխնոլոգիական արդյունաբերության նախարար Մխիթար Հայրապետյանը, հիմնադրամի նպատակը հանրօգուտ հեռուստաբովանդակության խթանումն է։ Խոսքը հատկապես կրթական, մշակութային, գիտական, սոցիալական և սպորտային հաղորդումների մասին է, որոնք դժվարությամբ են կարողանում եկամուտ ապահովել գովազդից։
Նախարարը հիշեցրեց, որ 2020 թվականին ընդունված «Տեսալսողական մեդիայի մասին» օրենքը պարտադրում է հանրային մուլտիպլեքսով հեռարձակվող հեռուստաալիքներին եթերի առնվազն 20 տոկոսը տրամադրել հանրօգուտ բովանդակությանը։ Սակայն, գովազդային սահմանափակումների պայմաններում, այդ պահանջը լրացնելու համար լրատվամիջոցները ֆինանսական խնդիրների են բախվում։ Այդ պատճառով էլ որոշվել է պետական աջակցությամբ խթանել նման հաղորդումների ստեղծումն ու հեռարձակումը։
Հիմնադրամը դրամաշնորհների միջոցով կաջակցի հեռարձակողներին՝ նպաստելով հանրօգուտ բովանդակության զարգացմանը։ Նախատեսվում է, որ հիմնադրամը սերտորեն կհամագործակցի մեդիա ոլորտի ներկայացուցիչների հետ։
Վարչապետ Նիկոլ Փաշինյանը շեշտեց՝ պետք է կարևորել ոչ միայն բովանդակության ստեղծումը, այլ նաև դրա դիտելիությունը։ Նրա խոսքով՝ եթե հանրությունն այն չի դիտում, ապա անհրաժեշտ կլինի վերանայել մոտեցումները։ Նախարար Հայրապետյանը վստահեցրեց, որ կանոնադրությունն այս դիտարկումների համաձայն կխմբագրվի։