Կոնդ թաղամասի վերակառուցման մրցույթը կրկին ավարտվեց առանց հաղթողի
Երևանի Կոնդ թաղամասի վերակառուցման հայեցակարգի մշակման մրցույթի երկրորդ փուլում ևս հաղթող նախագիծ չի ընտրվել։ Այս մասին քաղաքապետարանում կայացած գործակարգավարական խորհրդակցության ժամանակ հայտնել է Երևանի քաղաքապետի խորհրդական Սոնա Թևանյանը։
Նրա խոսքով՝ մրցույթին ներկայացված նախագծերից որևէ մեկը լիարժեք չէր համապատասխանում սահմանված պահանջներին։
Մրցույթն իրականացվում է քաղաքաշինության կոմիտեի նախաձեռնությամբ։ Թևանյանի փոխանցմամբ՝ այժմ ընթանում են աշխատանքներ՝ նոր մեխանիզմներով և մոտեցումներով մրցույթ կազմակերպելու ուղղությամբ։
Քաղաքապետ Տիգրան Ավինյանը հիշեցրել է, որ Կոնդի վերակառուցման գործընթացը մեկնարկել է դեռևս չորս տարի առաջ, երբ ինքը զբաղեցնում էր փոխվարչապետի պաշտոնը։ Նա նշել է, որ նախապես նախատեսվում էր այն ավարտել մեկ տարվա ընթացքում, սակայն մինչ օրս գործընթացը շարունակվում է։
Ավինյանը կոչ է արել կենտրոնանալ առկա արժեքավոր գաղափարների վրա և շարունակել աշխատանքը՝ նոր մոտեցումներով։