Ամենայն Հայոց Կաթողիկոսը օծեց Բելառուսի առաջին հայկական եկեղեցին
Մայիսի 18-ին Մինսկում տեղի ունեցավ պատմական իրադարձություն՝ Ամենայն Հայոց Կաթողիկոս Գարեգին Երկրորդը հանդիսապետեց Բելառուսում կառուցված առաջին հայկական եկեղեցու՝ Սուրբ Գրիգոր Լուսավորիչի օծման արարողությանը։
Եկեղեցին նախատեսված է միաժամանակ մինչև 75 հավատացյալի ընդունելու համար։
Նշենք, որ սա Վեհափառ Հայրապետի առաջին այցն է Բելառուս։ Նախօրեին՝ մայիսի 17-ին, նա այցելել էր Մինսկի Հաղթանակի հուշարձան՝ Հայրենական մեծ պատերազմում զոհվածների հիշատակին ծաղիկներ խոնարհելու նպատակով։
Բելառուսում բնակվող հայերի թիվը մոտ 9000 է։
Նրանք ակտիվորեն մասնակցում են երկրի մշակութային և հասարակական կյանքին։Բելառուսում գործում են հայկական համայնքների վեց ազգային-մշակութային հասարակական միավորումներ։ Մինսկում գործում է հայկական կիրակնօրյա դպրոց՝ շուրջ 150 աշակերտներով, ինչպես նաև «Էրեբունի» պարի համույթը, որը բազմիցս արժանացել է ազգային մշակութային միջոցառումների մրցանակների։