Հայկական կոնյակը վրացական կողմի թիրախում․ գործարարները արդեն կարող են վերսկսել արտահանումները
Վերջին օրերին Վրաստանը մի շարք խնդիրներ է ստեղծել Հայաստանից դեպի այլ երկրներ իր տարածքով արտահանվող ապրանքների համար։ Կառավարությունը և տնտեսվարողները պարբերաբար արձագանքում են, որ արգելքներ և խիստ մաքսատուրքեր են սահմանվել մի շարք ապրանքների վրա՝ ծաղիկներ, կոնյակ, տեքստիլ, ալյումին։ Բոլոր խնդիրները լուծվել էին, բացի կոնյակի արտահանումից։ Չնայած այդ ամենին՝ Հայաստանը հունիսի 5-7-ը Հայաստանում վրացական օրեր է կազմակերպել՝ հանրությանը ծանոթացնելով վրացական խոհանոցին, գինուն և այլ արտադրանքներին։
Հուլիսի 9-ին արդեն Պետական եկամուտների կոմիտեի նախագահ Էդուարդ Հակոբյանը հայտարարեց, որ հայկական բեռների տեղաշարժը Վրաստանի տարածքով դեպի Ռուսաստան վերսկսվել է։ Երկարատև դադարից հետո տեղական արտահանող ընկերությունները, որոնք արդեն մի ամիս է, ինչ բախվում են վրացական կողմի արգելքներին, կրկին կարող են իրենց արտադրանքը արտահանել Վրաստանի տարածքով։
Լավ նորություններ կան, որովհետև արդեն բեռները տեղաշարժվում են դեպի Ռուսաստան։ Վերջին օրերին սկսել է գործընթացը։ Այսինքն, երբ որ ապրանքը մաքսային սահմանով անցնում է, ինչ-որ տերմինալով վերահսկողություն են իրականացնում, և եթե ինչ-որ ապրանքի մեջ փորձաքննություն անելու կարիք կա, Վրաստանի մեր գործընկերները փորձաքննություն են իրականացնում։ Այդ փորձաքննության արդյունքներով հասկանում են՝ ինչ անեն։ Բայց լավ նորությունն այն է, որ արդեն հոսք կա, — հայտարարեց Հակոբյանը։
Սակայն փորձառու արտահանողները վստահ են՝ խնդիրը չի լուծվել ամբողջությամբ։ Վրաստանը դեռևս պահպանում է վերահսկողության խիստ մեխանիզմները, ինչի պատճառով հայաստանյան կոնյակ-գինի արտադրող մի շարք ընկերություններ մեծ ֆինանսական կորուստներ են կրել։ Ըստ այդմ՝ կառավարությունը խոստացել է որոշակի ֆինանսական աջակցություն տրամադրել տուժած կոնյակագործներին։
Արտահանողները մայիսի 13-ին և 21-ին բողոքի ակցիաներ էին անցկացրել Վրաստանի դեսպանատան դիմաց՝ պահանջելով հստակ պարզաբանումներ։ Նրանց խոսքով՝ Հայաստանից Ռուսաստան և Բելառուս ուղևորվող բեռնատարները կանգնեցվում են վրացական կողմում և հաճախ տեղափոխվում Գեյզի անցակետ։ Նրանք պահանջում են, որ լաբորատոր ստուգումները իրականացվեն Վրաստանի տարածքում, ինչը զգալիորեն ձգձգում է ընթացակարգը։