Երևանի ավագանին որոշել է ստեղծել հանձնաժողով՝ դպրոցների և մանկապարտեզների տարածքների օտարման գործընթացը ուսումնասիրելու համար
Երևանի ավագանին հունիսի 24-ին կայացած նիստում որոշել է ստեղծել քննիչ հանձնաժողով, որը կուսումնասիրի 1991 թվականի սեպտեմբերի 21-ից մինչև 2025 թվականը Երևանի նախկին թաղային համայնքներին և ներկայիս Երևան համայնքին պատկանած դպրոցների ու մանկապարտեզների տարածքների օտարման գործընթացները։ Նախագիծը ընդունվել է 35 կողմ, 5 դեմ և 16 ձեռնպահ ձայներով։ Հանձնաժողովի նպատակն է պարզել, թե ինչպես են իրականացվել կրթական նշանակության համայնքային տարածքների օտարումները՝ տարբեր ժամանակահատվածներում։
Հանձնաժողովը կազմվելու է ավագանու խմբակցություններից՝ յուրաքանչյուրից երեքական անդամի մասնակցությամբ։ «Մայր Հայաստան» խմբակցությունը հայտնել է, որ չի մասնակցելու հանձնաժողովի աշխատանքներին։
Քննարկման ընթացքում «Հանրային ձայն» խմբակցության ղեկավար Վահան Ավագյանը նշել է, որ իրենք կողմ են քվեարկելու նախագծին՝ կարևորելով գործընթացի միջոցով հնարավոր բացահայտումների նպատակը։ «Քաղաքացիական պայմանագիր» խմբակցության ղեկավար Արմեն Գալջյանը նշել է, որ հանձնաժողովը գործելու է ամբողջ ծավալով՝ ընդգրկելով նաև ներկայիս կառավարման շրջանը։
«Մայր Հայաստան» խմբակցության ղեկավար Մանուկ Սուքիասյանը նշել է, որ իրավական գործընթացները գոյություն ունեն և կարևորել է հարցին քաղաքական գնահատական չտալը։