Արթուր Ազնավուրյանը նշանակվել է ռազմական կցորդ Ֆրանսիայում
Վարչապետ Նիկոլ Փաշինյանի որոշմամբ, օգոստոսի 1-ից Հայաստանի նոր ռազմական կցորդը Փարիզում կլինի Արթուր Ազնավուրյանը։
Նա պաշտոնը կզբաղեցնի 3 տարի ժամկետով։ Ռազմական կցորդը դեսպանատան կազմում գտնվող հատուկ նշանակության պաշտոն է՝ ուղղված երկու երկրների զինված ուժերի կապի ամրապնդմանը, համագործակցության խորացմանը և ռազմատեխնիկական հարաբերությունների համակարգմանը։
Ո՞վ է Արթուր Ազնավուրյանը։ Նա ռազմական դիվանագետ է։ Նախքան Ֆրանսիա ուղարկվելը, նա ներկայացնում էր Հայաստանն Իրանում՝ որպես ռազմական կցորդ։
Ֆրանսիան վերջին տարիներին դարձել է Հայաստանի ռազմավարական գործընկերներից մեկը պաշտպանական ոլորտում։ Երևանն ու Փարիզը համագործակցում են թե՛ քաղաքական, թե՛ ռազմական մակարդակով՝ ներառյալ զինտեխնիկայի ձեռքբերումներ, ուսումնական ծրագրեր և վարժանքներ։
Ռազմական կցորդի պաշտոնը «կամուրջ» է հայկական բանակի և Ֆրանսիայի զինված ուժերի միջև։ Նրա գործառույթներն են՝ ներկայացնել Հայաստանի պաշտպանության նախարարությունը տեղական զինվորական ու քաղաքական շրջանակներում, կազմակերպել երկկողմ հանդիպումներ, ուսումնասիրել Ֆրանսիայի ռազմական զարգացումները, աջակցել հայ զինվորականների վերապատրաստման ծրագրերին և կապ պահպանել սփյուռքի ռազմավարական ներուժի հետ։