Պանրի արտադրամասում հայտնաբերվել են սանիտարահիգիենիկ խախտումներ
Երևանի կենտրոնում կասեցվել է անհատ ձեռնարկատեր Կամո Վահանյանին պատկանող պանրի արտադրամասի գործունեությունը՝ սանիտարահիգիենիկ պայմանների խախտման պատճառով։ Պարզվել է, որ արտադրամասում ապահովված չեն եղել սննդի անվտանգության նվազագույն պահանջները։
Պանրի հասունացման հատվածի նախագծումն ու կառուցվածքը չի բացառել աղտոտված և մաքուր գույքի խաչաձև հոսքերը, ինչն արդեն առողջապահական ռիսկեր է պարունակել։ Արտադրամասը չի ունեցել վերջնական արտադրանքի փաթեթավորման համար նախատեսված առանձին հատված, ինչն առանցքային պահանջ է սննդամթերքի անվտանգ կազմակերպման գործընթացում։
Բացի այդ, արտադրական տարածքի առաստաղները, հատակը, պատերը և դռները պատրաստված չեն եղել այնպիսի նյութերից, որոնք ենթակա են լվացման և ախտահանման։ Հատուկ խնդիր է արձանագրվել պանրի հասունացման տարածքում, որտեղ եղել է կեղտի կուտակման վտանգ, ինչպես նաև մասնիկների թափվելու հավանականություն՝ անմիջապես սննդամթերքի վրա։
Վերոնշյալ խախտումների հիման վրա տեսչական մարմնի ղեկավարի որոշմամբ արտադրամասի գործունեությունը կասեցվել է։ Տնօրինությանը տրվել է սահմանված ժամկետ խախտումներն ու անհամապատասխանությունները վերացնելու համար։