Հայաստանի բրոքերները կմտնեն ԵԱՏՄ բորսաներ. ի՞նչ կփոխվի մեզ համար
Հայաստանում գործող բրոքերներն ու դիլերները շուտով հնարավորություն կունենան աշխատել նաև Եվրասիական տնտեսական միության (ԵԱՏՄ) երկրների բորսաներում։ Կառավարությունը հավանություն է տվել մի համաձայնագրի, որի շնորհիվ հայկական ֆինանսական կազմակերպությունները կկարողանան իրենց հաճախորդների անունից գնել ու վաճառել արժեթղթեր ու ֆինանսական գործիքներ՝ ոչ միայն Հայաստանում, այլև՝ Ռուսաստանում, Բելառուսում, Ղազախստանում և ԵԱՏՄ անդամ մյուս պետություններում։
Այս փոփոխությունը կարևոր է մի քանի պատճառով։ Նախ, դա նշանակում է, որ Հայաստանում բրոքերների ծառայություններից օգտվողները՝ լինեն նրանք Հայաստանի քաղաքացիներ, թե օտարերկրյա ներդրողներ, կարող են ավելի լայն ընտրություն ունենալ․ նրանց հասանելի կլինեն նաև ԵԱՏՄ շուկաների ֆինանսական գործիքները։ Այսինքն՝ օրինակ, եթե որևէ ռուսական բորսայում շրջանառվում է շահավետ ընկերության բաժնետոմս, հայաստանցի ներդրողը կարող է դա գնել տեղական բրոքերի միջոցով՝ առանց ավելորդ ընթացակարգերի։
Նախագծի հեղինակները նշում են, որ այս քայլով Հայաստանը միանում է ԵԱՏՄ միասնական ֆինանսական շուկայի ձևավորման գործընթացին։ Այն նախատեսվում է 2025 թվականից։ Համաձայնագրի նպատակն է հեշտացնել ներդրումային շարժը և զարգացնել մեր արժեթղթերի շուկան։ Այլ կերպ ասած՝ այսպիսով հայաստանյան բորսան նույնպես կարող է գրավել արտասահմանյան ներդրողներին, եթե այն առաջարկի հետաքրքիր արժեթղթեր։
Հիշեցնենք, որ այս որոշումը կայացվել է Եվրասիական տնտեսական հանձնաժողովի կողմից այս տարվա ապրիլին, իսկ այժմ այն հաստատել է նաև Հայաստանի կառավարությունը։