Կառավարությունը ակնկալում է 50 միլիոն դոլարով վաճառել «Վիվա Արմենիա»-ի իր բաժնեմասը
Հայաստանի կառավարությունը որոշել է վաճառել «Վիվա Արմենիա» հեռահաղորդակցական ընկերությունում ունեցած իր բաժնեմասը։ Խոսքը 20 տոկոս բաժնետոմսերի մասին է։ Դրանք կառավարությունը նվիրատվությամբ ստացել էր այս տարվա փետրվարին։
Ըստ գործադիրի՝ բաժնեմասերի վաճառքից պետությունը ակնկալում է ստանալ շուրջ 50 միլիոն ԱՄՆ դոլար։ Այս որոշումը ընդունվել է օգոստոսի 7-ին կայացած կառավարության նիստում՝ առանց հարցի հրապարակային քննարկման։
Հիմք ընդունելով որոշումը՝ թույլատրվել է վարչապետի աշխատակազմին կնքել համապատասխան վաճառքի պայմանագիր՝ «Վիվա Արմենիա»-ի ներկայիս բաժնետեր «Ֆեդիլքո Գրուպ Լիմիթիդ» ընկերության հետ։ Պայմանագրի տեսակը՝ օպցիոն, նշանակում է, որ որոշակի պայմանների դեպքում գործարքը կարող է իրականացվել ապագայում՝ կողմերի համաձայնությամբ։
Հիշեցնենք՝ այս տարվա փետրվարին ընկերության բաժնետոմսերի 20 տոկոսը որպես նվիրատվություն փոխանցվել էր Հայաստանի կառավարությանը։ Այժմ այն որոշել է օգտագործել այդ բաժնեմասը ֆինանսական նպատակով։ Հատկանշական է, որ «Վիվա Արմենիան» նախատեսում է ձեռք բերել ռուսական «Ռոստելեկոմ»-ի (ներկայում՝ «Օվիո») հայկական ներկայացուցչությունը՝ «ՋԻԷՆՍԻ–ԱԼՖԱ» ընկերությունը։