Կոտայքի մարզում կասեցվել է հացի արտադրամասի աշխատանքը
ՀՀ սննդամթերքի անվտանգության տեսչական մարմնի Կոտայքի մարզային կենտրոնի տեսուչները վերահսկողական միջոցառումներ են իրականացրել անհատ ձեռնարկատեր Աշոտ Հակոբյանին պատկանող հացի արտադրամասում, որը գտնվում է ք. Հրազդանում։
Ստուգումների արդյունքում պարզվել է, որ արտադրամասը աշխատում է սանիտարահիգիենիկ խիստ խախտումներով, որոնք կարող են վտանգել սպառողների առողջությունը։
Նախ արտադրական շինությունների պատերի, առաստաղների, հատակի և պատուհանների մակերևույթները պատրաստված չեն եղել անջրանցիկ, լվացվող և ախտահանվող նյութերից, օդափոխության սարքերի քանակը կամ հզորությունը, կառուցվածքը և գործարկումը թույլ չեն տվել խուսափել սննդամթերքի աղտոտումից։
Արտադրական շինությունների, տեխնոլոգիական սարքավորումների, գույքի մաքրման, լվացման, միջատազերծման և կրծողների ոչնչացման պարբերականությունը սահմանված չի եղել, սարքավորումները, գործիքները և պարագաները չեն պահվել նորոգ վիճակում, իսկ անձնակազմի համար հանդերձարան չի ապահովվել։
Հաշվի առնելով վերը նշված խախտումները, հացի արտադրամասի արտադրական գործունեությունը կասեցվել է։
Սահմանվել է ժամկետ՝ բացահայտված անհամապատասխանությունները վերացնելու համար։