Քաղաքացիների 58 տոկոսը դեմ է Սահմանադրության փոփոխությանը, 55 տոկոսն էլ կասկածում է, որ խաղաղության պայմանագիրը կկնքվի
Հարցված քաղաքացիների մեծամասնությունը շարունակում է համոզված մնալ, որ Հայաստանի Սահմանադրության փոփոխությունը պետք է մնա բացառապես մեր երկրի ներքին գործը և որ որևէ այլ պետություն, այդ թվում՝ Ադրբեջանը, իրավունք չունի միջամտել այս գործընթացին։ Այս փաստն արձանագրվել է GALLUP International-ի օգոստոսի 25-30-ը անցկացված հարցման արդյունքում։ Դրա շրջանակում հարցազրույց է կատարվել 1101 մարդու հետ։
Անշուշտ, Ադրբեջանը նշում է, որ Սահմանադրության փոփոխությունը կարող է լինել վերջնական խաղաղության համաձայնագրի ստորագրման նախապայման, սակայն հարցվածների 25,1 տոկոսը համոզված է, որ սա հերթական քաղաքական ճգնաժամային մանիպուլյացիա է, և անկախ Սահմանադրության փոփոխությունից Ադրբեջանը համաձայնագիր չի ստորագրի։ Միայն 12,2 տոկոսն է պատրաստ կողմ քվեարկել փոփոխությանը, եթե վստահ լինի, որ այն կբերի իրական և երկարաժամկետ խաղաղություն։
Նույն հարցման շրջանակներում պարզ դարձավ նաև, թե ինչ վերաբերմունք ունեն մարդիկ օգոստոսի 8-ին Վաշինգտոնում ստորագրված եռակողմ հռչակագրի նկատմամբ։ Հարցվածների 34 տոկոսը փաստացի բացասական կարծիք է հայտնել, 13,6 տոկոսը՝ ավելի շատ բացասական, 22,8 տոկոսը լիովին դրական է գնահատել փաստաթուղթը, իսկ 19,3 տոկոսը՝ ավելի շատ դրական։ Սա ցույց է տալիս, որ բնակչության գրեթե կեսը փաստաթղթին բացասաբար է արձագանքել, սակայն բավականին մեծ տոկոս է դրական կարծիք ունեցել։
Սյունիքի տարածքով Ադրբեջանին ճանապարհ տրամադրելու հարցն առավել զգայուն է դարձել հասարակության համար. 47,6 տոկոսը բացասական է գնահատել այդ հնարավորությունը, 18,1 տոկոսը ավելի շատ դրական է համարել, իսկ 17,4 տոկոսը լիովին դրական։ Այս տվյալները ցույց են տալիս, որ ավելի քան 60 տոկոսը չի ընդունում այդ որոշումը։
Հարցվածների մի մասը, սակայն, վստահ է, որ Վաշինգտոնյան համաձայնագրերը կարող են իրական խաղաղություն բերել. ընդհանուր առմամբ 39 տոկոսն է հավատում երկարաժամկետ խաղաղության տեսլականին, սակայն ավելի քան 55 տոկոսը կասկածում է, որ փաստաթուղթը իրոք կստորագրվի։
Հիշեցնենք, որ օգոստոսի 8-ին Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը ստորագրեցին 7 կետից բաղկացած համատեղ հռչակագիր, որի շրջանակում ստեղծվելու է ռազմավարական տարանցիկ ճանապարհ Սյունիքի մարզով՝ «Թրամփի ուղի» անունով, որը ԱՄՆ կողմից վարձակալվելու է 99 տարի և ունի ևս 99 տարով երկարաձգման հնարավորություն։