Ճապոնական մանգայի միջազգային ցուցահանդեսը բացվեց Երևանում
Երևանի ժամանակակից արվեստի թանգարանում սեպտեմբերի 10-ին բացվել է ճապոնական մանգայի արվեստի գործերի միջազգային շրջիկ ցուցահանդեսը։ Այն առաջին անգամ է ներկայացվում Հայաստանում և կրում է «Manga Hokusai Manga» խորագիրը։
Ցուցահանդեսը համատեղ ուժերով իրականացվել է Ճապոնիայի հիմնադրամի և ՀՀ-ում Ճապոնիայի դեսպանատան աջակցությամբ։ Նախաձեռնության նպատակն է ներկայացնել մանգայի ժանրի պատմական զարգացումը՝ սկսած 19-րդ դարից մինչև մեր օրերը։
Ցուցադրությունը ընդգրկում է չորս հիմնական բաժին, որոնց միջոցով այցելուները կարող են տեսնել մանգայի էվոլյուցիան։ Հատուկ ուշադրության է արժանի ժամանակակից ճապոնացի նկարիչների նոր աշխատանքների յոթ հավաքածուն, որոնք ստեղծվել են Կացուշիկա Հոքուսայի և նրա մանգայի թեմայով։
Կացուշիկա Հոքուսայը մանգայի հիմնադիրներից է, որի առաջին հատորը լույս է տեսել ավելի քան երկու դար առաջ։ Ցուցահանդեսը ներկայացնում է ինչպես նրա ստեղծած հարուստ պատկերային ժառանգությունը, այնպես էլ ժամանակակից մանգայի համաշխարհային ճանաչում ստացած արտահայտչաձևերը։
Բացի արվեստի ներկայացումից, նախաձեռնությունը նպատակ ունի խորացնել հայկական և ճապոնական մշակութային կապերը՝ ընդգծելով երկու ժողովուրդների պատմության և մշակույթի ընդհանրությունները։
Ցուցահանդեսը բաց կլինի մինչև սեպտեմբերի 30-ը Ժամանակակից արվեստի թանգարանում։