Տիգրան Ավինյանը հաստատում է, որ հարցաքննվել է ԱՆԻՖ ընկերության գործով որպես վկա
Երևանի քաղաքապետ Տիգրան Ավինյանը հաստատեց, որ շուրջ մեկուկես տարի առաջ հարցաքննվել է ԱՆԻՖ ընկերության գործով։ Քաղաքապետը նշեց, որ եղել է վկա և արդեն փոխանցել է բոլոր տեղեկությունները, որոնք ուներ։
Նա հիշեցրեց, որ ժամանակին ԱՆԻՖ-ում զբաղեցրել է խորհրդի նախագահի պաշտոնը, սակայն ընթացքում գտնվող քննությունը, ըստ նրա, ուղղակիորեն չի վերաբերում այդ պաշտոնի լիազորություններին։ Ավինյանի խոսքով՝ կարևոր է չմոռանալ ԱՆԻՖ-ի ամենաարդյունավետ ծրագրերից մեկը՝ ամերիկյան «Օրբիս» ընկերության հետ համագործակցությունը։ Այդ ծրագրի շրջանակում Հայաստանում հիմնադրվել է նոր ընկերություն, որի նպատակն էր կիբեռանվտանգության մասնագետների պատրաստումը։
Սա տեղի ունեցավ պատերազմից հետո, 2021-ին, երբ բոլորին պարզ դարձավ, որ Հայաստանը խոցելի է կիբեռանվտանգության տեսանկյունից։ Ամերիկացի գործընկերները ընտրեցին երիտասարդ ուսանողներ, ովքեր պետք է այս ոլորտում ծառայություններ մատուցեին թե՛ պետական, թե՛ մասնավոր հատվածին, – նշեց Ավինյանը։
Ավինյանը նաև անդրադարձավ այն իրավիճակին, երբ էկոնոմիկայի նախարար Վահան Քերոբյանը կառավարությունում նախաձեռնեց որոշում, որով ԱՆԻՖ-ի ամբողջ փաթեթը փոխանցվեց նախարարությանը։
Այն պահին, երբ Քերոբյանը պարբերաբար քննադատում էր ԱՆԻՖ-ին՝ անարդյունավետության ու վատ կառավարման համար, միաժամանակ ձեռնարկում է քայլ, որով ամբողջ փաթեթը տեղափոխում է նախարարություն։ Դրանից հետո տեղի են ունենում կադրային կտրուկ փոփոխություններ, և մարդիկ պարզապես հրաժարվում են շարունակել իրենց աշխատանքը, – ասաց քաղաքապետը։