Նախընտրական շրջադարձ Վաղարշապատում. Սևակ Խաչատրյանը լքում է «էջմիածին» դաշինքը՝ գլխավորելու «Հաղթանակը»
Վաղարշապատ (Էջմիածին) խոշորացված համայնքում տեղի ունեցող նախընտրական գործընթացներում արձանագրվել է անսպասելի զարգացում։ Տեղական ընդդիմության առաջնորդներից Սևակ Խաչատրյանը հայտարարել է, որ լքում է «Էջմիածին» դաշինքը՝ գլխավորելու նոր ձևավորվող «Հաղթանակ» դաշինքը։
Այս քաղաքական վերադասավորումը տեղի է ունենում նոյեմբերի 16-ին կայանալիք Վաղարշապատ համայնքի ավագանու ընտրություններից առաջ։ Հատկանշական է, որ Խաչատրյանի այս որոշումը նախորդել է ընդամենը հոկտեմբերի 7-ին կատարված հայտարարությանը, որով նա հաստատում էր իր մասնակցությունը գալիք ընտրություններին՝ «Էջմիածին» դաշինքի ցուցակը գլխավորելով։ Այս կարճ ժամանակահատվածում կայացված որոշման փոփոխության մասին Սևակ Խաչատրյանը տեղեկացրել է տեսաուղերձի միջոցով։
«Հաղթանակ» դաշինքը նոր քաղաքական միավոր է, որը ձևավորվել է «Առաջ» աջակենտրոն կուսակցության և «Հայ Յեղափոխական Դաշնակցության» (ՀՅԴ) միավորման արդյունքում։
Այս զարգացումը առանցքային է դարձնում ՀՅԴ-ի դերակատարումը նախընտրական գործընթացում։ 2021 թվականի դեկտեմբերի 5-ին կայացած նախորդ տեղական ընտրություններում Սևակ Խաչատրյանը կրկին գլխավորում էր «Էջմիածին» դաշինքը, որը ձևավորվել էր ՀՅԴ-ի և «Համերաշխություն» կուսակցության ներուժի համատեղմամբ։
Սա թույլ է տալիս ենթադրել, որ Խաչատրյանի՝ «Էջմիածին»-ից «Հաղթանակ» դաշինք անցումը զուգահեռվել է կամ ուղեկցվել է ՀՅԴ կուսակցության նույնատիպ տեղաշարժով դեպի նոր քաղաքական միավոր։
Վաղարշապատի ընտրությունները, այսպիսով, մոտենում են նախընտրական լարված և անկանխատեսելի փուլին՝ քաղաքական ուժերի վերադասավորման ֆոնին։
Ինչպե՞ս կանդրադառնա այս փոփոխությունը նախընտրական ուժերի հարաբերակցության վրա և արդյո՞ք նոր դաշինքը կկարողանա հաջողությամբ մրցակցել գործող իշխանության հետ։ Հարցեր, որոնց պատասխանը ստանալու ենք նոյեմբերի 16-ին։
Վիկտորյա Հակոբյան