«Զավիկի ղարսը» հրաժարվեց դադարեցնել վտանգավոր սննդամթերքի արտադրությունը
Երևանի Սարյան 22 հասցեում գործող հանրային սննդի օբյեկտ՝ «Զավիկի ղարսը», հրաժարվել է իրականացնել Սննդամթերքի անվտանգության տեսչական մարմնի (ՍԱՏՄ) կողմից տրված կասեցման որոշումը:
Տեսչական մարմնի տեղեկացմամբ, տնտեսվարող Սամվել Տեր-Պողոսյանը ոչ միայն հրաժարվել է ստանալ պաշտոնական որոշումը, այլև սոցիալական ցանցերում պնդել է, թե ՍԱՏՄ-ի հրապարակած տեղեկությունները «կեղծ» են, ինչն ապակողմնորոշել է հանրությանը:
ՍԱՏՄ-ի լաբորատոր փորձաքննությունը ցույց է տվել, որ «հացով բրդուճ շաուրմայի խոզ+հավ» արտադրատեսակը և «մայոնեզը» պարունակում են աղիքային ցուպիկի խմբի մանրէներ, E.coli, S.aureus և սալմոնելա, ինչը չի համապատասխանում անվտանգության կանոններին:
Չնայած տեսչական մարմինը նախազգուշացնում է, որ «Զավիկի ղարսի» արտադրած սննդամթերքը վտանգավոր է առողջության համար և հորդորում է հասարակությանը խուսափել այն օգտագործելուց, Amnews-ին հաջողվեց կապ հաստատել հիմնարկի իրավաբան Արտակ Խաչատրյանի հետ։ Նա մեզ հետ զրույցում նշեց, որ ստուգումներ եղել են մի քանի օր առաջ, բայց իրենք արդյունքների մասին տեղեկացել են մամուլից։
Մենք լրագրողներից ենք իմացել նորությունը։ Որտեղ որ ստուգում իրականացնում են, իրենք պետք է վերջնարդյունքը տնտեսվարողին տեղեկացնեն։ Մենք տեղեկացված չենք եղել, էդ մարդիկ էլ ինչ-որ հայտարարություններ են արել, իրենք էլ թող պատասխանը տան։ Մենք մարդկանց ասում ենք բարեխղճորեն մեզ տեղեկացրեք, որովհետև, եթե առաջինը դուք եք տեղյակ, երկրորդը լրատվականները, ուրեմն ինչ-որ բան ճիշտ չի աշխատում։ Իրենք մեզ հետ լրատվամիջոցներով են խոսել, մենք էլ լրատվականով իրենց ենք պատասխանում։ Երբ մենք կտեղեկանանք խնդիրների մասին, այդ ժամանակ էլ կպատասխանենք նրանց, — նշեց իրավաբանը։
Այստեղից կարելի է հետևություն անել, որ կողմերի միջև անհամաձայնությունը ոչ միայն դժվարացնում է խնդիրների լուծումը, այլև հանրության համար ստեղծում է անորոշություն: Արդյունքում՝ վտանգի տակ է հայտնվում հենց սպառողը, ու հենց նա է վճարում բացթողումների գինը: