ՀՀ կառավարությունը մշակել է ապօրինի ավտոտնակների օրինականացման նոր նախագիծ
ՀՀ կառավարությունը շրջանառության մեջ է դրել նոր նախագիծ, որը նախատեսում է լուծել այն ավտոտնակների հարցը, որոնք մինչև 2005 թվականը չեն հաշվառվել և օրենքով համարվում են ապօրինի։ Այս մասին ԱԺ տնտեսական հարցերի մշտական հանձնաժողովի նիստի ժամանակ հայտարարեց ՀՀ կադաստրի պետական կոմիտեի նախագահ Սուրեն Թովմասյանը, պատասխանելով «Հայաստան» խմբակցության պատգամավոր Թադևոս Ավետիսյանի հարցին։
Նախագիծը նպատակ ունի պարզեցնել այն ընթացակարգերը, որոնց միջոցով քաղաքացիները կարող են օրինական տիրապետել իրենց ավտոտնակներին։ Ներկայում, երբ ավտոտնակը գրանցված է Կադաստրի կոմիտեում, իսկ հողը վարձակալված է առավելագույնը մինչև 5 տարի ժամկետով, քաղաքացին ստիպված է յուրաքանչյուր ժամկետի ավարտից հետո կրկին անցնել նույն ընթացակարգերը՝ նորից կնքել վարձակալության պայմանագիր, հաստատել նոտարով և գրանցել Կադաստրում։
Սուրեն Թովմասյանը հավելեց, որ նախագծի նախապատրաստման ընթացքում անհրաժեշտ է տարանջատել մինչև 2005 թվականը կատարված ավտոտնակների պետական գրանցումը և 2005 թվականից հետո առկա իրավիճակը։ Նա նշեց, որ մինչ 2005 թվականը ինքնակամ կառուցված ավտոտնակները պետական գրանցում են ստացել Կադաստրի կոմիտեում, սակայն առանց հողի նկատմամբ սեփականության իրավունքի։ Նոր նախագծով նախատեսվում է կարգավորել այս հարցը՝ հաշվի առնելով համայնքապետարանների որոշումները և Երևան քաղաքի գլխավոր հատակագիծը։
Թովմասյանը պարզաբանեց, որ նոր օրենսդրական փաթեթի ընդունումը չի նշանակում, որ բոլոր ավտոտնակները կօրինականացվեն։ Շատերը կստանան օրինականացման հնարավորություն միայն համայնքապետարանի որոշմամբ։ Նա նաև նշեց, որ եթե շինության սեփականաշնորհման ժամանակ վարձակալած հողը տրվել է անժամկետ, ապա քաղաքացին իրավունք ունի շարունակելու հարկ վճարել և տիրապետել ավտոտնակին՝ առանց լրացուցիչ գրանցման։
Նախատեսվում է, որ նոր օրենսդրական փոփոխությունների փաթեթը շուտով կուղարկվի ԱԺ քննարկման։