Հայանիստ–Հովտաշեն ճանապարհը փակ է արդեն 5 օր
Արարատի մարզի Մասիս համայնքում, Հայանիստից դեպի Հովտաշեն տանող ճանապարհի վրա գտնվող կամուրջը վնասվել է ավազով բեռնված ծանրաքարշ մեքենայի անցման հետևանքով, ինչի պատճառով ճանապարհը փակ է արդեն 5 օր։ Այս մասին Ազգային ժողովում 2026 թվականի պետական բյուջեի նախնական քննարկման ընթացքում հայտնել է տարածքային կառավարման և ենթակառուցվածքների նախարար Դավիթ Խուդաթյանը։
Նախարարի խոսքով՝ կամուրջը կառուցվել է մոտ 40–50 տարի առաջ և արդեն հնամաշ վիճակում էր։ Վերահսկողության արդյունքում որոշվել է անհապաղ սկսել վերակառուցման աշխատանքները։
Երեկ հանձնարարել եմ, որպեսզի ճանապարհային դեպարտամենտը որքան հնարավոր է շուտ սկսի կամրջի վերականգնման աշխատանքները։ Թեև սա շտապ լուծում պահանջող հարց է, այնուամենայնիվ, աշխատանքները նախնական նախագիծ են պահանջում, և մասնագետները ամենօրյա ռեժիմով զբաղված են այդ ուղղությամբ։ Մինչև շինարարության մեկնարկը, շրջանցիկ ճանապարհ է տրամադրվել՝ երթևեկությունն ապահովելու համար, — նշել է նախարարը։
Հավելենք, որ փլուզված կամուրջը գտնվում է «Մեյմանդար» գյուղմթերքի շուկա տանող ճանապարհին։