Հերքումներ «88»-ի սեփականության մասին պնդումներին
ՀՀ վարչապետի տիկին Աննա Հակոբյանը հրապարակային հայտարարությամբ արձագանքել է «88» սուպերմարկետների ցանցի հետ իր անունը կապող տեղեկություններին՝ դրանք որակելով անհիմն։ Հակոբյանը նշել է, որ իր ընտանիքը երբևէ չի օգտվել այդ խանութներից, ինքը չի եղել ոչ մի մասնաճյուղում և առաջիկայում էլ մտադրություն չունի օգտվելու ծառայություններից։
Փաստացի, «88» սուպերմարկետների ցանցի սեփականատերը գործարար Նարեկ Նալբանդյանն է։ Վերջինս վերջին տարիներին ձեռք է բերել մի շարք գույքեր, որոնց թվում են Հովիկ Աբրահամյանի առանձնատունը, Ծաղկաձորի «Գոլդեն Փելիս» հյուրանոցային համալիրը, ինչպես նաև Նոր Հաճնի «Շողակն» ադամանդի գործարանը։
Տարածվող լուրերն ակտիվացել են հատկապես այն բանից հետո, երբ «88 group»-ը սկսել է ընդլայնել սուպերմարկետների ցանցը Հայաստանի մի շարք մարզերում՝ Վայքում, Ստեփանավանում, Սարդարապետում և այլ համայնքներում։ Մի շարք բնակիչներ պնդում են, որ նոր խանութները «ստիպողաբար» են ձեռք բերվում։
«88»-ի ղեկավարությունը, արձագանքելով քաղաքացիների դժգոհություններին, հայտարարել է, որ բոլոր նոր մասնաճյուղերը բացվում են միայն պաշտոնական ընթացակարգերով․
«Մենք որևէ մեկի նկատմամբ միտումնավոր գործողություններ չենք իրականացնում։ Մեր գործունեությունը թափանցիկ է, և այդ մասին կարող են փաստել մեր գործընկերները»,- ասված է տարածված պարզաբանման մեջ։
Նարեկ Նալբանդյանն էլ հարցազրույցներից մեկում «ծիծաղելի» է որակել այն լուրերը, թե վարչապետի տիկինը կապ ունի սուպերմարկետների հետ։ Նրա խոսքով՝ վարչապետի հետ հանդիպել է ընդամենը երկու անգամ՝ արտադրական և հյուրանոցային համալիրների բացումների կապակցությամբ, և այդ հանդիպումները եղել են բացառապես պաշտոնական բնույթի։
Թեմայի շուրջ քննարկումներն ու տեղեկատվական հակասությունները շարունակվում են, մինչդեռ պաշտոնական աղբյուրները պնդում են, որ տարածվող լուրերը չեն համապատասխանում իրականությանը։