«Տաշիր կապիտալը» դատարանին խնդրել է կասեցնել կառավարության հնարավոր քայլերը ՀԷՑ-ի գույքի ձեռքբերման ուղղությամբ
«Տաշիր կապիտալ» ՓԲԸ-ն դիմել է դատարան՝ պահանջելով ժամանակավորապես արգելել ՀՀ կառավարության կողմից «Հայաստանի էլեկտրական ցանցեր» ընկերության բաժնետոմսերի կամ գույքի ձեռքբերմանն ուղղված գործողությունները։ Տեղեկությունը լրագրողներին հայտնել է ընկերության ներկայացուցիչ Վարդան Ալոյանը։
Նույն օրը մեկնարկել է «Տաշիր կապիտալ» ՓԲԸ-ի և Հանրային ծառայությունները կարգավորող հանձնաժողովի միջև դատական գործընթացի առաջին նիստը, որը վերաբերում է ՀԷՑ-ին էլեկտրաէներգիայի բաշխման լիցենզիայից զրկելու հարցին։
Ալոյանի խոսքով՝ պաշտպանական կողմը դատարանին դիմել է հայցի ապահովման միջոցներ կիրառելու խնդրանքով՝ նկատի ունենալով, որ դատական քննությունը նախատեսվում է ավարտել երկու ամսում, մինչդեռ կառավարությանը օրենքով երեք ամիս է տրված ՀԷՑ-ի բաժնետոմսերի կամ գույքի ձեռքբերման առաջարկ ներկայացնելու համար։ Այդ հիմքով, ըստ նրա, միջնորդություն է ներկայացվել նաև վարչական վարույթը կասեցնելու վերաբերյալ։
Նա տեղեկացրել է, որ դատարանը մերժել է ՀԷՑ-ի ժամանակավոր կառավարիչ Ռոմանոս Պետրոսյանին գործին որպես երրորդ կողմ ներգրավելու վերաբերյալ միջնորդությունը, ինչպես նաև թույլ չի տվել, որ «Տաշիր կապիտալը» ներկայացնի ՀԷՑ-ի շահերը։ Ալոյանի գնահատմամբ՝ այս իրավիճակում ընկերությունը փաստացի զրկված է արդյունավետ դատական պաշտպանության հնարավորությունից։
Նրա գնահատմամբ՝ այս հանգամանքը ՀԷՑ-ին զրկում է լիարժեք պաշտպանվելու հնարավորությունից, ինչպես դա տեղի է ունեցել նաև վարչական վարույթի ընթացքում։
Փաստաբան Արամ Օրբելյանն իր հերթին նշել է, որ ի սկզբանե հայցի ապահովման միջնորդություն ներկայացնելու անհրաժեշտություն չեն տեսել, քանի որ գործը պետք է ավարտվեր սահմանված ժամկետում։ Սակայն, երբ կառավարության ներկայացուցիչը ժամանակ է խնդրել դիրքորոշում ներկայացնելու համար, պաշտպանական կողմը որոշել է դիմել դատարանին։
Օրբելյանը հավելել է, որ ՀԷՑ-ի շուրջ ընդունված օրենսդրական փոփոխությունների հետ կապված տեսնում են սահմանադրական խնդիրներ։ Նրա խոսքով՝ հարցը ներկայում գտնվում է Սահմանադրական դատարանում, որը գործը կքննի փետրվարի 4-ին։