«Մարտի 1»-ի գործով մեղադրանքներ են առաջադրվել ևս երկու բարձրաստիճան պաշտոնյա
ՀՀ հակակոռուպցիոն կոմիտեն հայտնել է, որ «Մարտի 1»-ի դեպքերի առթիվ քրեական հետապնդումներ են հարուցվել ոստիկանության նախկին երկու պաշտոնատար անձանց՝ Ռոբերտ Մելքոնյանի և Վալերի Օսիպյանի նկատմամբ։ Նրանք այդ ժամանակ զբաղեցրել են Երևանի պարեկապահակակետային գնդի հրամանատարի և վերջինիս տեղակալի պաշտոնները։
Ըստ քննության տվյալների՝ նրանք կազմակերպել են Ազատության հրապարակում նստացույց անցկացնող խաղաղ ցուցարարներին ցրելու գործողությունները՝ բռնության և հատուկ միջոցների կիրառմամբ։
Հիշեցնենք, որ 2008 թվականի փետրվարի 20-ից Երևանում ընդդիմությունը՝ ՀՀ առաջին նախագահ Լևոն Տեր-Պետրոսյանի գլխավորությամբ, ցույցեր էր անցկացնում նախագահական ընտրությունների արդյունքների դեմ։ Մարտի 1-ին իրադարձությունները վերածվեցին զանգվածային անկարգությունների, որոնց հետևանքով զոհվեց 10 մարդ, ավելի քան 200-ը՝ վիրավորվեց։
Մարդու իրավունքների եվրոպական դատարանը նախորդ տարվա սեպտեմբերին հրապարակած վճռով արձանագրել է, որ զոհերի մեծ մասի դեպքերում Հայաստանը խախտել է կյանքի իրավունքը։
«Մարտի 1»-ի գործով ՀՀ երկրորդ նախագահ Ռոբերտ Քոչարյանն ու նրա երեք նախկին բարձրաստիճան ենթակաները չորս տարի առաջ արդարացվել էին, սակայն մեկ տարի առաջ գործը վերաբացվել է։ Անցած ամիս Հակակոռուպցիոն դատարանը հաստատել է Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի նկատմամբ նոր մեղադրանքների որոշումները։
2025 թվականի օգոստոսին հայտնի դարձավ, որ ոստիկանության պետի նախկին տեղակալ Սաշա Աֆյանը կրկին ունի մեղադրյալի կարգավիճակ նույն գործով։
