«Ֆերետաբ քոմպ» դեղի մի շարք սերիաներ հետ են կանչվում շրջանառությունից

Առողջապահական և աշխատանքի տեսչական մարմինը կարգադրագիր է ընդունել դադարեցնել «Ֆերետաբ քոմպ» դեղամիջոցի մի շարք սերիաների շրջանառությունը և իրականացնել դրանց հետկանչ։

Որոշումը հիմնված է «Դեղերի և բժշկական տեխնոլոգիաների փորձագիտական կենտրոն» ՊՈԱԿ-ի կողմից 2026 թվականի մարտի 16-ին ներկայացված գրության և փորձաքննության եզրակացության վրա։ Դրան համապատասխան՝ 2026 թվականի մարտի 17-ին կարգադրագրեր են տրվել մի շարք ներմուծող ընկերությունների՝ «Տոնուս-Լես», «Ալֆա–Ֆարմ Իմպորտ», «Նատալի Ֆարմ», «Էսկուլապ-Իմպորտ» և «Թեոֆարմա Իմպորտ»։

Հետկանչը վերաբերում է «Ֆերետաբ քոմպ» (երկաթի ֆումարատ, ֆոլաթթու) դեղապատիճների հետևյալ սերիաներին՝ F02490, G08684, G08683, G08033, H10279, H01931 և F02491։

Գրանցման հավաստագրի իրավատեր «Ացինո Ֆարմա ԱԳ» ընկերության տեղեկացմամբ՝ նշված սերիաների լաբորատոր հետազոտությունների ընթացքում հայտնաբերվել է երկաթի քանակական պարունակության անհամապատասխանություն սահմանված չափանիշներին։

Տեսչական մարմինը հորդորում է քաղաքացիներին ուշադրություն դարձնել և չօգտագործել նշված սերիաներով դեղամիջոցը՝ հնարավոր ռիսկերից խուսափելու համար։