Մեղրիի, Երասխի և Իջևանի երկաթգծերը կվերագործարկվեն
Հայ-ադրբեջանական ապաշրջափակման կոնտեքստում քննարկվում է երկաթգծերի վերագործարկումը։ Սրա մասին ճեպազրույցում հայտնում է Տարածքային կառավարման և ենթակառուցվածքների նախարար Գնել Սանոսյանը։
Նախատեսվում է վերագործարկել Մեղրիի, Երասխի և Իջևանի երկաթգծերը։ Մեղրիի հատվածը ավելի մեծ կապի ու հնարավորությունների համակարգ է թե Իրանի, թե արդեն Ադրբեջանի, թե նաև Թուրքիայի մասով։
Համընդհանուր խաղաղության խաչմերուկով պետք է բոլոր երկաթգծերը վերագործարկվեն։ Այս գործընթացի համար պետությունը նախնական նախատեսել էր 200 միլիոն դոլար։
Եթե բանը հասնի շինարարություններին, այդ եղած նախնական թվերը կբերվեն վերջնական տեսքի։ Այսինքն՝ նախագիծ կպատվիրենք։ Դրա արդյունքում պարզ կդառնա գումարն ու ժամկետները։ Կբյուջետավորենք, կբաժանենք տարիների մեջ, թե յուրաքանչյուր տարվա համար ինչքան գումար է անհրաժեշտ։ 200 միլիոնը խիստ նախնական է,- նշել է Սանոսյանը։
Հայաստանը կվերագործարկի նաև իր ինքնիշխան տարածքով անցնող բոլոր կապուղիները՝ ապահովելով բեռների, տրանսպորտային միջոցների և մարդկանց անվտանգությունը։ Այս նախաձեռնությունը ներառված է «Խաղաղության խաչմերուկ» նախագծում։