Հայաստանը առաջարկներ է արել Ադրբեջանին խաղաղության պայմանագրի չհամաձայնեցված 2 հոդվածների վերաբերյալ
Հայաստանի վարչապետ Նիկոլ Փաշինյանը մամուլի ասուլիսում հայտարարել է, որ Ադրբեջանի հետ խաղաղության պայմանագրի 17 հոդվածից 15-ը համաձայնեցված է, երկուսի մասով էլ Հայաստանն առաջարկել է լուծումներ։ Փաշինյանը մանրամասնել է, թե չհամաձայնեցված կետերը որոնք են և որոնք են դրանց լուծումները։
Փաշինյանն իր խոսքում նշել է, որ չհամաձայնեցված հոդվածներից մեկը վերաբերում է երրորդ երկրների ուժերի ներկայացուցիչներ սահմանի երկայնքով չտեղակայելուն:
Մենք առաջարկում ենք, որ դա կիրառվի սահմանի սահմանազատված հատվածների նկատմամբ: Նաև կա խնդիր իրավական հարթություններում՝ վեճերի՝ միջազգային ատյաններից հետ կանչելու թեման, որը որոշակի հանգամանքներում և պայմաններում մեզ համար կարող է ընդունելի լինել։
Մամուլի ասուլիսում Փաշինյանն անդրադաձել է նաև նոյեմբերի 9-ի եռակողմ հայտարարությանը՝ նշելով, որ դա ամբողջական փաստաթուղթ է, որի մի շարք դրույթներ չեն իրագործվել, այդ թվում՝ Լեռնային Ղարաբաղում ռուս խաղաղապահ առաքելության ներկայությունը, ինչպես նաև Լաչինի միջանցքի պահպանումը։
Վարչապետը նաև հերքեց այն պնդումները, թե Հայաստանի որևէ տարածքի նկատմամբ ինքնիշխանության սահմանափակում պետք է տեղի ունենա։
Նման բան չկա գրված։ Հայաստանի Հանրապետությունը երբեք որևէ փաստաթղթով, որևէ ձևով մասամբ կամ ամբողջությամբ իր որևէ տարածքի նկատմամբ իր ինքնիշխանությունից և իրավազորությունից ոչ միայն չի հրաժարվել, այլև որևէ կերպ չի համաձայնվել իր իրավազորության սահմանափակմանը։ Այնտեղ կա Ռուսաստանի անվտանգության դաշնային ծառայության ուժերի մասին, բայց ոչ մի տեղ գրված չի, որ այդ ուժերը պետք է գետնի վրա ներկա լինեն։ Եվ ավելին, տասնյակ անգամ ասել եմ դրա մասին, Ռուսաստանի Դաշնության նախագահի 2020 թվականի նոյեմբերի հրամանագիրը անդրադարձել է այդ թեմային, որտեղ էլի հստակ արձանագրված է, որ սուբյեկտը, որը գործողություններ է անում գետնի վրա, դա Հայաստանի Հանրապետությունն է։