Հայաստանը պատրաստվում է միանալ Աշգաբադի համաձայնագրին. ի՞նչ կտա դա մեր երկրին
Հայաստանը պատրաստվում է միանալ Աշգաբադի համաձայնագրին, որը ստորագրվել է Իրանի, Օմանի, Կատարի, Թուրքմենստանի և Ուզբեկստանի միջև։ Փաստաթուղթը նպատակ ունի ստեղծել միջազգային տրանսպորտային և տարանցիկ միջանցք, որը կկապի Կենտրոնական Ասիան Պարսից ծոցի և Օման ծովի նավահանգիստների հետ։
Համաձայնագիրը հնարավորություն կտա կարգավորելու համաձայնագրի կողմ հանդիսացող երկրների միջև տրանսպորտի տարբեր տեսակներով լոգիստիկ փոխադրումների իրականացման գործընթացը, ինչպես նաև կնպաստի երկրների միջև փոխշահավետ տնտեսական և գործարար կապերի խթանմանը, համագործակցության ընդլայնմանը, Հայաստանի Հանրապետության տարանցիկ դերի բարձրացմանը, — նշված է ծրագրի հիմնավորման մեջ։
ՀՀ տարածքային կառավարման և ենթակառուցվածքների նախարարության խոսքով՝ այս համաձայնագրին միանալը նոր հնարավորություններ կբացի Հայաստանի համար։ Այն կօգնի մեր երկրին դառնալ կարևոր տարանցիկ օղակ, նպաստել լոգիստիկ կապերի զարգացմանը, բեռնափոխադրումների դյուրացմանը և տրանսպորտային ծախսերի կրճատմանը։
Աշգաբադի համաձայնագիրը կնպաստի նաև մաքսային ընթացակարգերի պարզեցմանը, միջազգային շուկաներին հասանելիության ընդլայնմանը և Հայաստանի տնտեսական կապերի ամրապնդմանը ինչպես տարածաշրջանում, այնպես էլ դուրս այն։