ՊՆ-ում կատարած շինաշխատանքների ընթացքում հափշտակվել է ավելի քան 81 միլիոն դրամ. մեղադրանք է առաջադրվել 7 անձի
Հայաստանի հակակոռուպցիոն կոմիտեի քննած քրեական գործով բացահայտվել են Պաշտպանության նախարարության և կապալառու ընկերությունների միջև կնքված պայմանագրերով կատարված խախտումներ, որոնք հանգեցրել են պետությանը պատճառված մեծ ծավալի գույքային վնասների։
Քննությամբ պարզվել է, որ 2023 թվականի հունիսին ՊՆ-ն և կապալառու ընկերությունը պայմանագիր են կնքել շինարարական աշխատանքների իրականացման համար։ Սակայն աշխատանքները կատարվել են թերի՝ օգտագործելով ոչ միայն ցածրորակ, այլ նաև նախապես համաձայնեցվածից երեք անգամ ավելի էժան նյութեր։ Այս պայմաններում ընկերության տնօրենը, համագործակցելով տեխնիկական հսկողություն իրականացնող ընկերության ղեկավարի հետ, կազմել է կեղծ ակտեր, որոնցում թաքցվել են իրական խախտումները։ Արդյունքում ՊՆ-ից հափշտակվել է 81.1 մլն դրամ։
Բացի այդ, նույն գործով պարզվել է, որ ՊՆ պաշտոնատար անձը, թերի աշխատանքները ընդունելու դիմաց, կապալառուից պահանջել և մասամբ ստացել է 10 մլն դրամ կաշառք։
Հետաքննության ընթացքում բացահայտվել են նաև 2024 թվականի հուլիսին կնքված մեկ այլ պայմանագրի խախտումներ։ Դրանց շրջանակում, աշխատանքների թերությունները անտեսելու համար, կապալառուն կաշառք է տվել ՊՆ երկու պաշտոնյաների՝ ընդհանուր 2.1 մլն դրամի չափով։ Ապօրինություն է արձանագրվել նաև գնումների մրցույթի փուլում՝ կապալառու ընկերությունների ղեկավարները, խախտելով ընթացակարգը, կաշառք են տվել ՊՆ նախկին աշխատակցին՝ մրցույթում հաղթող ճանաչվելու համար։
Հայտնի է դարձել նաև, որ նույն ընկերությունների ներկայացուցիչները 2025 թվականի հունիսին ևս կաշառք են տվել մեկ այլ ՊՆ պաշտոնյայի՝ անհրաժեշտ տեղեկանք ստանալու նպատակով։
Ընդհանուր առմամբ, մեղադրանք է առաջադրվել 7 անձի՝ այդ թվում ՊՆ պաշտոնատար անձանց և շինարարական ընկերությունների ղեկավարների։ Նրանցից մի քանիսի նկատմամբ որպես խափանման միջոց կիրառվել է տնային կալանք, իսկ մեկի նկատմամբ՝ կալանավորում։