Դոնալդ Թրամփը «պատմական օր» է խոստանում․ Սպիտակ տանն այսօր կարող է խաղաղության համաձայնագիր կնքվել
ԱՄՆ նախագահ Դոնալդ Թրամփը հայտարարել է, որ Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը Սպիտակ տանը կարող է դառնալ պատմական՝ տարածաշրջանում խաղաղության հաստատման համար։
Ալիևը և Փաշինյանը կհանդիպեն ինձ Սպիտակ տանը՝ խաղաղության պաշտոնական համաձայնագիր ստորագրելու համար։ Միացյալ Նահանգները նաև կնքելու է երկկողմ համաձայնագրեր թե՛ Հայաստանի, թե՛ Ադրբեջանի հետ՝ տնտեսական հնարավորությունները միասին զարգացնելու նպատակով։ Մենք ցանկանում ենք բացահայտել Հարավային Կովկասի ամբողջ ներուժը։ Հպարտ եմ, որ այս խիզախ առաջնորդները ճիշտ քայլ են անում՝ ի շահ երկու երկրների ժողովուրդների։ Սա պատմական օր է լինելու ոչ միայն Հայաստանի և Ադրբեջանի, այլև ԱՄՆ-ի ու ողջ աշխարհի համար,– գրել է Թրամփը սոցցանցում։
Նա ընդգծել է, որ տարիներ շարունակ տարբեր առաջնորդներ փորձել են վերջ տալ հակամարտությանը, բայց չեն հասել արդյունքի։ Թրամփի խոսքով՝ իր վարչակազմը երկար բանակցություններ է վարել երկու կողմերի հետ, և այժմ խաղաղության պայմանագիրը կստորագրվի հենց այս ջանքերի շնորհիվ։
Հայաստանի կառավարությունը դեռ ավելի վաղ էր հայտնել, որ օգոստոսի 7-8-ը Նիկոլ Փաշինյանը կայցելի ԱՄՆ՝ մասնակցելու ինչպես երկկողմ հանդիպմանը Թրամփի հետ, այնպես էլ եռակողմ ձևաչափով՝ Ադրբեջանի նախագահի մասնակցությամբ։ Օրակարգում խաղաղության հաստատումն է, տարածաշրջանային բարօրության և տնտեսական համագործակցության ընդլայնումը։
Ամերիկյան կառավարության աղբյուրները հայտնել են, որ կողմերը պատրաստվում են ստորագրել մի շարք փաստաթղթեր։ Դրանք վերաբերում են ոչ միայն խաղաղությանը, այլև տնտեսական ու գործընկերային նոր ծրագրերին։
ԱՄՆ պետքարտուղար Մարկո Ռուբիոն նույնպես հույս է հայտնել, որ այս հանդիպումը կդառնա խաղաղության համաձայնագրի մեկնարկային կետը․
Հուսով եմ՝ Հայաստանը և Ադրբեջանը այսօր կստորագրեն համաձայնագիր և կսկսեն իրական խաղաղության ճանապարհը։
Նա հիշեցրել է, որ Թրամփը նախկինում նույնպես միջնորդել է այլ տարածաշրջանային հակամարտությունների ավարտի գործում՝ Հնդկաստան–Պակիստան, Կամբոջա–Թաիլանդ և այլ օրինակներում։