Արցախի նախագահը դատի է տալու 9–րդ դասարանի «Հայաստանի պատմություն» դասագրքի հեղինակներին ու ԿԳՄՍ-ին
Արցախի Հանրապետության նախագահ Սամվել Շահրամանյանի անունից փաստաբան Ռոման Երիցյանը պատրաստվում է դատական հայց ներկայացնել 9–րդ դասարանի «Հայաստանի պատմություն» դասագրքի հեղինակների, ԿԳՄՍ նախարարության և պատասխանատու այլ անձանց դեմ։ Այս մասին փաստաբանը հայտնել է իր «Ֆեյսբուք» էջում։
«Պահանջելու ենք հերքել նախագահի վերաբերյալ գրքում տեղ գտած զրպարտչական տեղեկությունները։ Մենք վճռական ենք պայքարելու պատմության խեղաթյուրումների և նոր սերնդին մոլորեցնելու փորձերի դեմ»,– գրել է Երիցյանը։
Գրքում Արցախի հայաթափման մասին մասնավորապես նշվում է․
2023 թ. սեպտեմբերի 19-ին Ադրբեջանը ԼՂՀ դեմ հարձակում սկսեց։ 24 ժամ տևած ռազմական գործողության արդյունքում Լեռնային Ղարաբաղը տվեց 223 զոհ։ ԼՂՀ նախագահը ստորագրեց ԼՂՀ-ն լուծարելու հրամանագիր։ ԼՂՀ-ում մնացած ողջ հայ բնակչությունը՝ ավելի քան 100.000 մարդ, հարկադրված լքեց իր հայրենիքը։ — Մեկ այլ տեղում նշված է․ — 44-օրյա պատերազմի և Ադրբեջանի գործողությունների
արդյունքում Արցախում առաջանում է սոցիալքաղաքական խոր ճգնաժամ։ Այն հանգուցալուծվում է 2023 թ. սեպտեմբերին՝ Սամվել Շահրամանյանին ԱԺ-ում նախագահի պաշտոնում ընտրելով։
Հիշեցնենք, որ 2024 թվականի հուլիսի 11-ի ՀՀ կառավարության նիստում հաստատվել է «Հայոց պատմություն» առարկան «Հայաստանի պատմություն» անվանափոխելու որոշումը, որի շուրջ քննարկումները տևական ժամանակ շարունակվել են։ Առարկայի անվանման փոփոխության նախաձեռնությունը, սակայն, մեծ դժգոհություն է առաջացրել հասարակության շրջանում․ e–draft.am կայքում անցկացված քվեարկության մեծ մասը դեմ է եղել այս փոփոխությանը։