ԵԱՀԿ Մինսկի խումբը պաշտոնապես լուծարված է
Սեպտեմբերի 1-ից ԵԱՀԿ Մինսկի խումբը և դրա հետ առնչվող կառույցները պաշտոնապես լուծարվել են։ Այս մասին հաստատվել է ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենի նամակով՝ նշելով, որ որոշման լռելյայն ընթացակարգը ԵԱՀԿ բոլոր 57 անդամ պետությունների կողմից չի խախտվել։ ԵԱՀԿ-ն մինչև 2025-ի դեկտեմբերի 1-ը կլուծարի Մինսկի խումբը։
Հիշեցնենք, որ Հայաստանը և Ադրբեջանը օգոստոսի 8-ին Վաշինգտոնում ստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը, որի մաս է կազմում Մինսկի խմբի լուծարման համատեղ դիմումը։
ԵԱՀԿ գործող նախագահը և գլխավոր քարտուղար Ֆերիդուն Սինիրլիօղլուն ողջունել են որոշումը՝ նշելով, որ այն պատմական նշանակություն ունի և ցույց է տալիս, որ կողմերը կարող են հասնել համաձայնության անգամ տասնամյակների հակամարտությունից հետո։ Նրանք վերահաստատել են հանձնառությունը՝ աջակցելու այն ջանքերին, որոնք երկարատև խաղաղություն և կայունություն կբերեն Հայաստանում, Ադրբեջանում և տարածաշրջանում։
Ադրբեջանի ԱԳՆ-ն հայտնել է, որ Մինսկի խմբի լուծման որոշմամբ անվավեր են ճանաչվում նախկինում ԵԱՀԿ շրջանակներում հայ-ադրբեջանական հակամարտությանը վերաբերող փաստաթղթերը։
Մինսկի խումբը ստեղծվել է 1992 թվականին, և նրա համանախագահներն են Ռուսաստանը, Ֆրանսիան և ԱՄՆ–ը։ 2022 թվականին Ֆրանսիան և ԱՄՆ–ը հրաժարվել էին խմբի շրջանակներում Մոսկվայի հետ համագործակցությունից, ինչը նախանշեց գործընթացի ավարտի ճանապարհը։