«Մանդարինկա պարկ» ռեստորանը տուգանվել է՝ առանց թույլտվության երկու կապիկ պահելու համար
Աշտարակի խճուղում գտնվող «Մանդարինկա պարկ» ռեստորանային համալիրում Բնապահպանության և ընդերքի տեսչական մարմինը հայտնաբերել է օրենքի խախտում, ինչի հետևանքով համալիրին նշանակվել է վարչական տուգանք՝ 170 հազար դրամի չափով։ Ստուգումների ընթացքում պարզվել է, որ համալիրում պահվել են երկու մարմոզետ տեսակի կապիկներ՝ առանց համապատասխան թույլտվության։
Ըստ «Կենդանական աշխարհի մասին» օրենքի՝ անազատ և կիսաազատ պայմաններում վայրի կենդանիներ պահելու համար անհրաժեշտ է ստանալ հատուկ թույլտվություն, հակառակ դեպքում պատասխանատու անձինք ենթակա են վարչական պատասխանատվության։ Տեսչական մարմինը խախտումը որակել է օրենքի 27.1-րդ հոդվածի երրորդ մասի պահանջների չկատարում և կիրառել տուգանք։
Ներկայումս քննարկվում է կապիկներին համապատասխան վայր տեղափոխելու հարցը՝ ապահովելու համար նրանց բնականոն խնամքն ու անվտանգությունը։