Նիդերլանդները 14 միլիոն եվրո է հատկացնում Լեռնային Ղարաբաղից տեղահանվածներին
Նիդերլանդների արտգործնախարար Դավիդ Վան Վելը իր X–ի միկրոբլոգում գրել է, որ իր երկիրը 14 միլիոն եվրո կհատկացնի Լեռնային Ղարաբաղից տեղահանվածներին մատչելի բնակարաններով ապահովելու համար։ Գումարը փոխանցվելու է Համաշխարհային բանկի «Արտոնյալ ֆինանսավորման գլոբալ գործիքի հիմնադրամի» միջոցով։ Առաջին հայացքից սա հերթական միջազգային օգնության ծրագիր է՝ հումանիտար նպատակներով։ Սակայն հարց է առաջանում՝ ինչու հենց Նիդերլանդները նման նախաձեռնությամբ հանդես եկավ, և արդյո՞ք այստեղ միայն մարդասիրական շարժառիթներն են որոշիչ։
Արցախի 2023 թվականի դեպքերից հետո մոտ 100 հազար փախստական Հայաստանում շարունակում է մնալ բնակարանային ու սոցիալական խնդիրների առաջ։ Հիմա մենք տեսնում ենք, որ միջազգային ճնշումն Ադրբեջանի նկատմամբ նվազում է, և Լեռնային Ղարաբաղի հարցը դուրս է մղվում գլոբալ օրակարգից։
Չպետք է անտեսել նաև տնտեսական բաղադրիչը։ Նիդերլանդների ԱԳ նախարարի ու Արարատ Միրզոյանի հանդիպման հաղորդագրությունից պարզ է դառնում, որ քննարկվել են առևտրային ու գործարար կապերի ընդլայնման հնարավորությունները։
Նիդերլանդների 14 միլիոն եվրոն կարևոր է հազարավոր փախստականների համար։ Սակայն հասարակական և քաղաքական առումով հարցն ավելի խորքային է․ արդյո՞ք Հայաստանը դառնում է հերթական երկիրը, որտեղ միջազգային կառույցներն ու երկրները ոչ միայն մարդասիրական աջակցություն են ցուցաբերում, այլև ամրապնդում իրենց քաղաքական դիրքերը։ Հետևաբար՝ կարևոր է, որ նման ծրագրերը չդիտարկվեն միայն որպես օգնություն։ Դրանք նաև արտաքին քաղաքական շահերի արտահայտում են։