Նոր մեղադրանք Գյումրու քաղաքապետին․ նրա խոսքը որակվել է որպես ինքնիշխանությունից հրաժարվելու կոչ

Գյումրու քաղաքապետ Վարդան Ղուկասյանի նկատմամբ հարուցված նոր քրեական գործը պաշտպանական խումբը որակում է ոչ թե իրավական, այլ քաղաքական դրդապատճառներ ունեցող հետապնդում։ Քաղաքապետի պաշտպանները հայտարարում են, որ Ղուկասյանը պարզապես արտահայտել է իր անձնական կարծիքը, մինչդեռ իշխանությունները փորձում են այն ներկայացնել որպես հանցագործություն։ Հոկտեմբերի 25-ին պարզվել է, որ Վարդան Ղուկասյանի դեմ քրեական հետապնդում սկսելու որոշումն ընդունվել է դեռևս սեպտեմբերի կեսերին՝ նրա հրապարակային հայտարարության հիման վրա։ Քրեական գործի հիմքում ընկած է ՀՀ հակակոռուպցիոն դատարանի բակում քաղաքապետի հնչեցրած այն միտքը, թե․ «Իմ ցանկությունն է, որ միություն կազմենք։ Այսօր ամբողջ Եվրոպան է միություն կազմում, Չինաստանն ու Ռուսաստանն են միություն կազմում։ Հայաստանն իրանից ինչ է ներկայացնում, որ միություն չկազմի»։ Իրավապահ մարմինները այս խոսքերը որակել են որպես Հայաստանի ինքնիշխանությունից հրաժարվելու կոչ՝ ՀՀ Քրեական օրենսգրքի 422-րդ հոդվածի 2-րդ մասի համաձայն։ Պաշտպանները խստորեն պնդում են, որ քաղաքապետի ասածը Հայաստանի դիրքը աշխարհի մյուս երկրների հետ համեմատող և անկախությունը պահպանելու անհրաժեշտությունը շեշտադրող կարծիքի արտահայտություն է, այլ ոչ թե ինքնիշխանությունը կորցնելու կոչ։ Իրենց հայտարարության մեջ նրանք նաև նշում են, որ նման դրույթը պետք է վերաբերի նաև ԵՄ անդամակցության մասին հրապարակային խոսքերին։ Ի լրումն, պաշտպանական կողմը քաղաքական դրդապատճառների մասին վկայող փաստ է համարում գործը շաբաթ օրը՝ հայտարարությունից մեկ ամիս անց, հարուցելու հանգամանքը։ Նրանք նաև հիշեցնում են վարչապետի հոկտեմբերի 1-ի ելույթի մասին, որը, ըստ պաշտպանների, ուղղված էր Ղուկասյանին քաղաքական դաշտից դուրս մղելուն։