Երևանում մեկ տարեկան երեխայի նկատմամբ բռնությունը եղել է դիտավորյալ
Երևանում մեկ տարեկան երեխայի նկատմամբ բռնության դեպքը եղել է դիտավորյալ, այլ ոչ թե պատահականության արդյունք։ Այդ մասին հայտնել է ՀՀ ներքին գործերի նախարար Արփինե Սարգսյանը։
Նրա խոսքով՝ ահազանգը ստացվել է բժշկական կենտրոնից, որտեղ տեղափոխվել էր 1 տարեկան 2 ամսական տղա երեխան։ Իրականացված օպերատիվ գործողությունների արդյունքում պարզվել է, որ տեղի ունեցածը դիտավորյալ արարքի հետևանք է։
Նախարարության կողմից անմիջապես հաղորդում է ուղարկվել Քննչական կոմիտե, նախաձեռնվել է քրեական վարույթ՝ սպանության փորձի հատկանիշներով։ Այն անձը, որը կասկածվում է այդ արարքի կատարման մեջ, ձերբակալվել է և հանձնվել Քննչական կոմիտեին։ Խոսքը խորթ մոր մասին է, — նշել է Սարգսյանը։
Ավելի վաղ հաղորդվել էր, որ երեխայի սպանության փորձի կասկածանքով մեկ անձ է ձերբակալվել։
Երեխայի վիճակը գնահատվում է ծայրահեղ ծանր։
Լրատվամիջոցի տեղեկություններով՝ երեխայի կենսաբանական մայրը Արարատի մարզի Մասիս համայնքի բնակիչ է և ունի ևս երեք երեխա։ Նրանցից երկուսը գտնվում են խնամակալության ներքո Երևանում բնակվող ընտանիքում, մեկը՝ տատիկի խնամքի տակ է, իսկ տուժած երեխան վերջին շրջանում ապրում էր հոր և խորթ մոր հետ Երևանի Արաբկիր վարչական շրջանում։
