Կատարում գտնվող քաղաքացիները կապի մեջ են դեսպանության հետ
Ռազմական գործողությունների մեկնարկից ի վեր Կատարում ՀՀ դեսպանության հետ կապ է հաստատել Կատարի տարածքում տարանցիկ գտնվող Հայաստանի Հանրապետության 41 քաղաքացի։ Դեսպանությունից հայտնում են, որ քաղաքացիների հետ կապը կրում է մշտական բնույթ։
Նշվում է, որ քաղաքացիներից 38-ը ճանապարհորդելիս են եղել «Qatar Airways» ավիաընկերության միջոցով։ Ավիաընկերության կողմից նրանց համար ապահովվել են կեցության և սննդի բոլոր պայմանները։
Դեսպանության տվյալներով՝ քաղաքացիներից երկուսն ունեցել են դեղորայքի կարիք. անհրաժեշտ աջակցությունը ցուցաբերվել է Դոհայում ՀՀ դեսպանության կողմից։
Մարտի 6-ին դեսպանությունում կազմակերպվել է հանդիպում, որին մասնակցել են Դոհայում մնացած ՀՀ բոլոր քաղաքացիները։ Քննարկման ընթացքում դեսպանության կողմից գնահատվել են նրանց կարիքները։
Միաժամանակ նշվում է, որ Կատարի տարածքում գտնվում է ևս երեք ՀՀ քաղաքացի, որոնց դեպքում նույնպես դիտարկվում են Հայաստան վերադարձի հնարավոր տարբերակներ։
Ըստ նախնական տվյալների՝ «Qatar Airways» ընկերության մարտի 9-ի չվացուցակում այս պահին ներառված է դեպի Երևան նախատեսված չվերթը։
