Իսպանական մամուլի անդրադարձը հայկական ակումբի ֆուտբոլիստի խաղին

«Նոան» Կոնֆերենցիաների լիգայի Լիգայի փուլի առաջին տուրում հաղթանակով մեկնարկեց։ Երևանում կայացած խաղում «Նոան» 2 անպատասխան գնդակ ուղարկեց չեխական «Մլադա Բոլեսլավի» դարպասը։ Գոլերից մեկը հեղինակեց Մաթեուս Այաշը, ում խաղին անդրադարձել է Իսպանական Sport.es պարբերականը։

Հարձակվողը հայկական ակումբից առաջ խաղացել է նաև իսպանական «Միրանդեսում»։

Մաթեուս Այաշը, որը կուռք էր «Միրանդեսում», փայլում է Կոնֆերենցիաների լիգայում՝ խաղալով հայկական «Նոայում»։ Բրազիլացին խփեց «Նոայի» պատմական գոլը՝ առաջինը Կոնֆերենցիաների լիգայի Լիգայի փուլում։  

Հայկական «Նոան», որն ընդամենը 7 տարվա պատմություն ունի, իր նորամուտը նշեց Լիգայի փուլում չեխական «Մլադա Բոլեսլավի» դեմ խաղում:  

Խաղը տեղի էր ունենում Հայաստանի մայրաքաղաք Երևանում, և 58-րդ րոպեին հայկական թիմն առաջ անցավ հաշվի մեջ։

Եվրագավաթների հիմնական փուլում նրանց երբևէ խփած առաջին գոլի հեղինակը մեծն Մաթեուս Այաշն էր:

Բրազիլացի ֆուտբոլիստն իսկական կուռք էր «Միրանդեսում»՝ 2019-20 մրցաշրջանում գավաթային հիանալի մրցաշրջանով, որում Անդուվայի ֆուտբոլիստները հասան մինչև կիսաեզրափակիչ:

27-ամյա Մաթեուսը հասցրել է խաղալ «Օվիեդոյում», «Ռասինգ Սանտանդերում», բացի այդ՝ ԱՄՆ–ի «Օռլանդո Սիթիում» և պորտուգալական «Մորեյրենսեում»:

Sport.es-ը նաև անդրադարձել է հայկական ակումբի պատմությանն ու անվան նշանակությանը։

Հիմա նա երջանիկ է՝ խաղալով հայկական ակումբում, որը ստեղծվել է 2017 թվականին «Արցախ» անվանվամբ։ Հետագայում ակումբն անվանափոխվել է «Նոա»՝ ի պատիվ Նոյի: 

Ըստ լեգենդի՝ կենդանիներով լի տապանը իջել է հայկական Արարատ լեռան վրա։ Հենց այստեղից էլ ծագում է ակումբի անունը: Մաթեուս Այաշն արդեն հայկական ֆուտբոլի պատմության մեջ է. հիշարժան գոլ և 2։0 հաշվով հաղթանակ, — գրել է պարբերականը: