Նպաստից կարող են զրկվել այն ընտանիքները, որոնք իրենց երեխաներին դպրոց չեն տանի
Առաջարկվում է նպաստից զրկել նպաստառու այն ընտանիքներին, որոնք հրաժարվում են իրենց երեխաներին դպրոց տանելուց։ Սրա մասին ասել է Կրթական տեխնոլոգիաների ազգային կենտրոնի (ԿՏԱԿ) տնօրեն Արտակ Պողոսյանը։
Ըստ Պողոսյանի՝ դա միջազգային պրակտիկայում կիրառվող մեթոդ է։
Կրթությունից դուրս մնացած երեխաների կրթության ապահովումը մեկ նախարարության կամ գերատեսչության խնդիրը չէ, այն պետության և բոլորի խնդիրն է: Աշխարհում այս խնդիրը լուծելու նպատակով տարբեր պրակտիկաներ են կիրառում, օրինակ՝ կիրառում են այսպես ասած պատժի մեթոդը: Օրինակ, երբ դու նպաստառու ընտանք ես, և պետությունը քեզ գումար է տալիս, որպեսզի դու քո ընտանիքի անդամների հիմնական իրավունքները ապահովես, իսկ կրթությունը հիմնարար իրավունք է, այսինքն՝ պետությունը այդ գումարը տրամադրում է նաև, որպեսզի ընտանիքն ապահովի երեխային դպրոց ճանապարհելու կարիքները՝ լուծելով երեխայի սոցիալական խնդիրները: Բայց, երբ ընտանիքը շարունակում է դա չապահովել, երեխան դպրոց չի հաճախում և չի ներգրավվում կրթության մեջ, պետությունը կասեցնում է նպաստը: Հենց երեխան կսկսի մի քանի ամիս շարունակաբար հաճախել դպրոց, ապա պետությունը կվերականգնի ընտանիքի նպաստը:
Պողոսյանը նշել է նաև, որ նախագծի առաջարկը ուղարկվել է Աշխատանքի և սոցիալական հարցերի նախարարություն։ Վերջին քննարկման ժամանակ առաջարկը հավանության է արժանացել: