Էկոնոմիկայի նախարարը մանրամասներ է հայտնել Վրաստանի տարածքում մնացած բեռնատարների մասին
Երևանը դեռ սպասում է Վրաստանի պարզաբանումին հայկական բեռնատարների` Կոբի քաղաքի տերմինալում կանգնեցնելու հետ կապված։ ՀՀ էկոնոմիկայի նախարար Գևորգ Պապոյանը լրագրողներին ասաց, որ ավելի քան 100 հայկական բեռնատար, որոնք հիմնականում բեռնված են շինանյութերով, դեռ գտնվում են Վրաստանի տարածքում։
Նախարարը նշեց, որ հայկական կողմը դեռ չի ստացել մանրամասն բացատրություն վարորդների կողմից թույլ տրված կոնկրետ խախտումների վերաբերյալ։
Ավելի վաղ վարորդները հայտնել էին, որ խնդիրը ծագել է փետրվարի 12-ին։ Բեռնատարները կանգնեցվել են Վերին Լարսի անցակետի մոտ գտնվող Կոբի քաղաքի տերմինալում։ Նրանք պնդել են, որ փաստաթղթերի հետ կապված խնդիրներ չունեն ու տեղյակ չեն, թե ինչու իրենց չեն թողնում մուտք գործել երկիր։
Որոշ բեռնատարներ թույլատրվել է հատել սահմանը, սակայն մնացածները դեռ կանգնած են Կոբի քաղաքի TIR-պարկում։
Լրագրողների այն հարցերին, թե հնարավո՞ր է այս ամենը քաղաքական ենթատեքստ ունի, Պապոյանը ձեռնպահ մնաց որևէ մեկնաբանություն տալուց։
Նա նաև նշել է, որ օրեր առաջ Երևան ժամանած Վրաստանի էկոնոմիկայի նախարար Մարիամ Կվրիվիշվիլիից խնդրի վերաբերյալ պարզաբանում է խնդրել։ Վրացի գործընկերը նշել է, որ խնդիրը կապված չէ իրենց գերատեսչության հետ․ հայկական բեռնատարներին կանգնեցրել է Վրաստանի ֆինանսական ոստիկանությունը, որը ենթակա է ֆինանսների նախարարությանը։
Հիշեցնենք, որ հայկական բեռնատարները տարանցման խնդիրների են բախվել նաև 2025 թվականի գարնանը և ամռանը՝ կապված կոնյակի և հեղուկ գազի մատակարարման հետ, և սա այս տարվա առաջին նման դեպքն է։
