Իրավապահ մարմինների և քաղաքացու կարծիքները կրկին չեն համընկնում

Արդեն քանի օր է, ինչ համացանցում մեծ արձագանք է ստացել Վանաձորի ոստիկանների կողմից Տիգրան Ուլուբաբյանի ենթադրյալ խոշտանգման դեպքը։ Տուժողը հայտարարել էր, որ իրեն 8 հոգով ծեծել են, քաշել մազերից և հայհոյել։ Նա պահանջել էր պատասխանատվության ենթարկել բռնություն կիրառած ոստիկաններին։

Հարցը չէր կարող նաև անարձագանք մնալ Ներքին գործերի նախարարության կողմից։ Նախարար Արփինե Սարգսյանը այսօր մանրամասներ է հաղորդել դեպքի վերաբերյալ և հայտարարել, որ Ներքին անվտանգության և հակակոռուպցիոն վարչությունում ծառայողական քննություն է հարուցվել, զուգահեռ՝ Քննչական կոմիտեում նաև քրեական վարույթ է նախաձեռնվել։

Ըստ ենթադրյալ տուժողի խոսքերի՝ 8 հոգով ինտենսիվ ծեծ է եղել իր նկատմամբ։ Պիտի նշեմ, որ դատաբժշկական փորձաքննություն եղել է և ծառայողական քննության շրջանակներում երեկ ստացվել է եզրակացությունը։ Փորձագետը եզզրակացության եզրափակիչ մասում նշել է հետևյալը․ «Բուժհաստատությունում նշած ձախ ականջախեցու և գլխի ծոծրակային շրջանի փափուկ հյուսվածքներ-սալջարդեր ախտորոշումը հիմնավորված չէ զննության օբյեկտիվ տվյալներով, որի պատճառով էլ որպես մարմնական վնասվածք չի ընդունվում և չի մեկնաբանվում»։ Սա ուղղակի փաստեր եմ արձանագրում, որ յուրաքանչյուրս դեպքին օբյեկտիվ նայենք, — նշել է Արփինե Սարգսյանը։

ԱԺ–ում Արփինե Սարգսյանը վստահեցրեց, որ Հայաստանում լինի ՀՀ քաղաքացի, թե ԼՂ–ից բռնի տեղահանված անձ, եթե կա անձի իրավունքների խախտման հետ կապված հարց, չկա որևէ տարբերություն։

Եթե քննության արդյունքում պարզվեց, որ ոստիկանության ծառայողները ունեն մեղավորություն, միանշանակ նրանք կենթարկվեն պատասխանատվության։ Եթե պարզվեզ, որ կա կեղծ մեղադրանք ոստիկանների նկատմամբ, ըստ այդմ պիտի վրա հասնի պատասխանատվություն` սուտ մատնության համար, — խոսքը եզրափակել է Արփինե Սարգսյանը։