Կամո Ցուցուլյանը վերանշանակվել է ՆԳՆ ՓԾ տնօրեն-ներքին գործերի նախարարի տեղակալի պաշտոնում

Կամո Ցուցուլյանը վերանշանակվել է Ներքին գործերի նախարարության փրկարար ծառայության տնօրեն-ներքին գործերի նախարարի տեղակալ։ Որոշումը կայացրել է վարչապետ Նիկոլ Փաշինյանը։

Ղեկավարվելով «Հանրային ծառայության մասին» օրենքի 6-րդ հոդվածի 3.1-ին մասով և 9-րդ հոդվածի 7-րդ մասով, «Փրկարար ծառայության մասին» օրենքի 31-րդ հոդվածի 1-ին մասով և «Կառավարչական իրավահարաբերությունների կարգավորման մասին» օրենքի 11-րդ հոդվածի 6-րդ մասով՝ Փրկարար ծառայության տնօրեն-ներքին գործերի նախարարի տեղակալի ժամանակավոր պաշտոնակատար Կամո Ցուցուլյանին վերանշանակել փրկարար ծառայության տնօրեն-ներքին գործերի նախարարի տեղակալի պաշտոնում,- ասված է որոշման մեջ։

Ցուցուլյանը այս պաշտոնին նշանակվել էր դեռ 2023 թվականի հունվարի 9-ին։ Վարչապետի որոշմամբ 2024 թվականի ապրիլին Ցուցուլյանին շնորհվել է փրկարարական ծառայության գեներալ-մայորի կոչում։

2024 թվականի ապրիլին նա Կոռուպցիայի կանխարգելման հանձնաժողով է ներկայացրել իրեն պատկանող գույքը։ Ըստ կայքի տվյալների՝ Ցուցուլյանը հայտարարագրել է մեկ բնակարան Երևանի Դավթաշեն վարչական շրջանում, մեկ բնակարան Իջևան քաղաքում, հասարակական նշանակության երկու շինություն Տավուշում, հողամաս և անհատական բնակելի տուն։

Տվյալ տարվա վերջում առկա կանխիկ դրամի գումարը կազմել է 22,000 դոլար և 19,000,000 դրամ։ Ստացված եկամտի գումարը կազմել է 21,807,894 դրամ։