«Հայաստանը չի դիտարկում «3+3» ձևաչափով հանդիպումները որպես խաղաղության պայմանագրի կնքման հարթակ»․ Արարատ Միրզոյան
Հոկտեմբերի 23-ին Ազգային ժողովի հարց ու պատասխանի փուլում Արարատ Միրզոյանը անդրադարձել է «3+3 ձևաչափով հանդիպումներին։ Նա նշել է, որ Հայաստանը կարևորում է հարևանների հետ հարաբերությունները և ձգտում է զարգացնել դրանք։
Միրզոյանը անդրադարձել է նաև այն հայտարարությանը, ըստ որի՝ առաջարկվում էր «3+3» ձևաչափով հանդիպումների հարթակը օգտագործել խաղաղության պայմանագրի կնքման համատեքստում։
Այդ առաջարկը մեծ հաշվով չկա էլ դրված սեղանին և եթե լինի էլ, մենք նպատակարմար չենք գտնի դրան դրական արձագանքել, որովհետեւ մենք Ադրբեջանի հետ ունենք երկողմ բանակցությունների ձևաչափ, ընդ որում՝ բոլոր ուղղություններով՝ և՛ սահմանազատման, և՛ խաղաղության պայմանագրի, և՛ հարաբերությունների կարգավորման շուրջ, — ասել է Միրզոյանը։
Վերջին հանդիպման ընթացքում Հայաստանի և Ադրբեջանի արտգործնախարարները հերթական անգամ քննարկել են խաղաղության պայմանագրի տեքստը: Միրզոյանը հայտարարել է, որ չնայած Բաքվից հնչող ոչ կառուցողական հռետորաբանությանը, Հայաստանը շարունակում է հետևողականորեն աշխատել հարաբերությունների կարգավորման ուղղությամբ:
Հայաստանի արտգործնախարարը իր ելույթում անդրադարձել է նաև Հայաստան-Թուրքիա հարաբերություններին։ Ըստ Միրզոյանի՝ հայ-թուրքական հարաբերություններում արձանագրվել է դրական զարգացում, մասնավորապես՝ օդային տարածքից օգտվելու հարցում: Չնայած սահմանի բացման վերաբերյալ նախնական պայմանավորվածությունները դեռևս չեն իրականացվել, աշխատանքները այդ ուղղությամբ շարունակվում են: