Հայաստանը շահագրգիռ է Վրաստան-ԵՄ հարաբերությունների դրական զարգացմամբ
Հայաստանը շահագրգիռ է, որ Եվրոպական միության և Վրաստանի միջև հարաբերությունները դուրս գան ներկայիս լարված փուլից և զարգանան կառուցողական ուղղությամբ։ Այս մասին Ազգային ժողովում եվրոպական ինտեգրման հարցերի հանձնաժողովի նիստում հայտարարել է ՀՀ ԱԳ նախարարի տեղակալ Վահան Կոստանյանը։
Նա անդրադարձել է «Հայաստան» խմբակցության պատգամավոր Արմեն Գևորգյանի հարցին, որը վերաբերում էր Վրաստանի և Եվրամիության միջև քաղաքական երկխոսության սառեցված վիճակի ազդեցությանը Հայաստանի եվրաինտեգրման գործընթացի վրա։
Կոստանյանի խոսքով՝ եթե Վրաստան-ԵՄ հարաբերություններում գրանցվի առաջընթաց, դա կստեղծի ավելի բարենպաստ միջավայր նաև Հայաստան-ԵՄ համագործակցության խորացման համար։ Նա նշել է, որ Երևանը հետաքրքրված է այդ գործընթացի դրական զարգացմամբ և այդ ուղղությամբ որոշակի քայլեր են իրականացվում։
Թեմային ավելի վաղ անդրադարձել էր նաև ՀՀ վարչապետ Նիկոլ Փաշինյանը՝ Եվրոպական խորհրդարանում ունեցած ելույթում նշելով, որ Վրաստանը Հայաստանի համար կարևոր ուղի է դեպի Եվրոպական միություն։ Նրա գնահատմամբ՝ Վրաստանի և ԵՄ-ի միջև հարաբերությունների զարգացումը նշանակություն ունի երկու երկրների համար էլ։
Բացի այդ, մարտի 3-4-ին Վրաստան կատարած այցի ընթացքում Փաշինյանը հանդիպել է Վրաստանի վարչապետ Իրակլի Կոբախիձեի հետ՝ ընդգծելով, որ Վրաստանը Հայաստանի համար առանցքային գործընկեր է նաև Եվրամիության հետ հարաբերությունների համատեքստում։
