Մասյացոտնի թեմի քահանաները հանդես են եկել համատեղ հայտարարությամբ
Մասյացոտնի թեմի 19 հոգևորական հայտարարություն են տարածել՝ նշելով, որ թեմի առաջնորդի փոփոխությունը չի եղել քահանաների նկատմամբ որևէ պարտադրանքի կամ ճնշման հետևանք։
Կանգնած լինելով մեր խղճի և պատասխանատվության առջև՝ Վեհափառ Հայրապետին ներկայացրել ենք նախկին առաջնորդի իրական կերպարը։ Այսօր, հետահայաց նայելով Վեհափառ Հայրապետի կողմից առաջնորդի փոփոխության որոշմանը, մենք՝ քահանաներս ու հավատացյալները, հստակ ու շոշափելիորեն զգում ենք թեմում թևածող ազատության շունչը և հոգևոր ուրախությունը, որ փորձ է արվում նախկին առաջնորդի կողմից հակականոնական և հակասահմանադրական ճանապարհով մեզանից խլելու
Հարկ է նշել, որ Ամենայն հայոց կաթողիկոս Գարեգին Բ-ի հայրապետական տնօրինությամբ Մասյացոտնի թեմի առաջնորդ տեր Գևորգ եպիսկոպոս Սարոյանը հունվարի 10-ին ազատվել էր պաշտոնից։ Որոշումը դատարանում վիճարկելու և հրամանին չենթարկվելու համար հունվարի 27-ին նա կարգալույծ էր հռչակվել։ Հայրապետական տնօրինությամբ թեմի առաջնորդական տեղապահ է նշանակվել տեր Ռուբեն վարդապետ Զարգարյանը։
Հայտարարության մեջ հոգևորականները նաև անդրադարձել են նախկին առաջնորդ Արման Սարոյանի հրապարակային պնդումներին՝ նշելով, որ դրանք ապատեղեկատվություն են և վիրավորական բնույթ ունեն։ Նրանք նշել են, որ Արման Սարոյանի առաջնորդության տարիներին, իրենց գնահատմամբ, թեմում առկա են եղել վախի, սպառնալիքների և անորոշության մթնոլորտ, ինչպես նաև սոցիալական խնդիրներ։
Նշվում է, որ թեմի նախկին ղեկավարի կողմից քահանաների ծառայության վայրերի հաճախակի և կամայական փոփոխությունները բացասաբար են անդրադարձել ծառայության որակի և ընտանիքների հոգեբանական կայունության վրա։
Հիշեցնենք, որ 2026 թվականի հունվարի 4-ին վարչապետ Նիկոլ Փաշինյանը և կաթողիկոսի հեռացումը պահանջող 10 եպիսկոպոսներ հայտարարել էին Հայ առաքելական եկեղեցու «բարենորոգման» գործընթացի մեկնարկի մասին։
Փետրվարի 14-ին դատախազությունը քրեական հետապնդում էր հարուցել Գարեգին Բ–ի նկատմամբ՝ Մասյացոտնի թեմի նախկին առաջնորդի վերաբերյալ դատական ակտի կատարումը խոչընդոտելու մեղադրանքով և սահմանափակել նրա ելքը Հայաստանից։ Նույն գործով են անցնում մի խումբ հոգևորականներ։
