«2029 թվականից «Ակադեմիական քաղաքում» կլինեն առաջին շենքերը»․ Ժաննա Անդրեասյան
Ակադեմիական քաղաքի աշխատքները մեկնարկել են նախորդ տարի՝ կառավարության կողմից «Ակադեմիական քաղաքի» հայեցակարգի հաստատումից հետո։ Այս մասին Ազգային ժողովի հարց ու պատասխանի փուլում հայտարարել է ԿԳՄՍ նախարար Ժաննա Անդրեասյանը։ Նա նշել է, որ քաղաքի կառավարման մոդելի շուրջ կնքված պայմանագիր արդեն կա, մշակվել ու պայմանագիր է կնքվել նաև տրանսպորտային նախագծի իրականացման մասին։
Ընթացքում են նաև մյուս բոլոր աշխատանքները, որոնք մեզ թույլ են տալիս ասել, որ մենք կարող ենք պլանավորվածի պես սկսել շինարարական աշխատանքները։ 2029 թվականից սկսած՝ «Ակադեմիական քաղաքում» կլինեն առաջին շենքերը։ Այնուհետև՝ փուլային սկզբունքով կկատարվեն նաև մյուս աշխատանքները, — ասել է Անդրեասյանը։
Առաջին փուլում նախատեսվում է տեղափոխել կրթական, տեխնոլոգիական, արվեստի և սպայական, երկրորդ փուլում՝ դասական և բժշկական համալսարանները։
Նախատեսվում է նաև «Ակադեմիական քաղաքում» ստեղծել մշակութային բազմաֆունկցիոնալ համալիրներ, կացարանային հատվածներ, երկաթուղային կայարաններ և մարզադահլիճներ։