«Temu» օնլայն առևտրի հարթակում տվյալների արտահոսք է եղել
Անվտանգության փորձագետ Լևոն Իսաջանյանը հայտնել է, որ չինական «Temu» առևտրային հարթակի հաճախորդների տվյալների մեծ արտահոսք է տեղի ունեցել։ Նախնական տվյալներով՝ 87 միլիոն հաճախորդի տվյալներ են արտահոսել։ Դրանց մեջ եղել են ՀՀ քաղաքացիների անձնական տվյալներ՝ օգտանուն, մեյլի հասցե, հեռախոսահամար, ինչպես նաև որոշ գաղտնագրված տվյալներ։ Փորձագետը իր ֆեյսբուքյան էջում մանրամասներ է հայտնել։ Նա կայքից օգտվողներին խորհուրդ է տվել փոխել գաղտնաբառը․
Ըստ նախնական տվյալի՝ վճարային քարտի տվյալ չեն արտահոսել։ Առաջին վտանգը այն է, որ էլեկտրոնային փոստերի դեմ կարող են կատարել որոշակի հարձակումներ։
Երկրորդ վտանգը այն է, որ անձի նույնականացումը հեռախոսի և էլեկտրոնային փոստի միջոցով հեշտ կլինի։ Կա ռիսկ, որ կարող եք Whatsapp-ի կամ այլ նման ծրագրերի վրա ստանալ խարդախություն պարունակող հաղորդագրություններ։
Կիբերանվտանգության մասնագետ Սամվել Հայրապետյանը նույնպես անդրադարձել է այդ խնդրին և մի քանի խորհուրդներ տվել՝ հետագա խնդիրներից խուսափելու համար․
Էդ մարդիկ այդ անձնական տվյալները կարող են օգտագործել այնպես՝ ինչպես որ կցանկանան, այդ իսկ պատճառով էլ արեք հետևյալ քայլերը․
1. Փոխեք «Temu»-ի ձեր գաղտնաբառը,
2. Եթե ձեր Email-ի ու «Temu»-ի գաղտնաբառը նույնն է, ապա Email-ինն էլ փոխեք ու դրեք այլ բան,
3. Եթե կցած բանկային քարտ ունեք ապա ժամանակավորապես անջատեք կայքից,
4. Քարտի վրա փորձնական մի քիչ գումար քցեք և սպասեք, եթե գումարը կորի կամ ձեր փոխարեն առևտուր փորձեն անել, ապա դիմեք ձեր քարտը սպասարկող բանկ թող սառեցնեն ու նոր քարտ տան,
5. Պատրաստ եղեք որ գուցե ձեր անունից պատվերներ անեն ու ձեր պրոֆիլի վրա պարտք գոյացնեն, նման դեպքում կապվեք «Temu»-ի support-ի հետ:
Մասնագետները նշել են, որ նման կայքերից օգտվելը ու ամեն տեղ անձնական տվյալներ լրացնելը կարող են նման խնդիրների պատճառ դառնալ։ Այդ իսկ պատճառով կարևոր է ուշադիր լինել անձնական տվյալները այս կամ այն կայքում հրապարակելիս։