Բաքուն հայտարարեց, որ չի ստորագրի խաղաղության պայմանագիր այս պահին համաձայնեցված կետերով
Ադրբեջանը անընդունելի է համարում Հայաստանի հետ խաղաղության պայմանագրի կնքումը ներկայումս համաձայնեցված կետերով, սրա մասին Report-ին ասել է Ադրբեջանի արտաքին գործերի նախարարության մամուլի խոսնակ Այխան Հաջիզադեն։
Հայկական կողմն առաջարկում է խաղաղության համաձայնագիր կնքել՝ հիմնվելով ներկայումս համաձայնեցված դրույթների վրա, սակայն ադրբեջանական կողմն այս մոտեցումն անընդունելի է համարում եւ բազմիցս հայտարարել է այդ մասին։ Կա կանոն, որ փաստաթուղթը համաձայնեցված չի համարվում, քանի դեռ դրա բոլոր կետերը համաձայնեցված չեն: Կարելի է միայն ասել, որ ներկայումս հաստատվել է փաստաթղթի դրույթների մոտ 80%-ը։ Բայց հնարավոր չէ պարզապես բացառել տարաձայնությունների կետերը,- ասել է Հաջիզադեն՝ հավելելով, որ խաղաղության համաձայնագրի համար անհրաժեշտ է պարզաբանել խնդրահարույց հարցերը։
Սեպտեմբերի 9-11-ը Երևանում անցկացվում է «Երևանյան երկխոսություն» միջազգային ֆորումի ժամանակ Նիկոլ Փաշինյանը հայտնեց, որ Հայաստանի պատրաստակամ է առաջիկա հնարավոր ժամկետներում ստորագրել պայմանագրի համաձայնեցված կետերը։
Ես ուզում եմ վերահաստատել մեր պատրաստակամությունը, իմ պատրաստակամությունը՝ ստորագրել համաձայնեցված տեքստը առաջիկա հնարավոր ժամկետում,- ասել է Փաշինյանը։
Սեպտեմբերի 14-ին էլ ՌԴ փոխվարչապետ Ալեքսեյ Օվերչուկը, ըստ TACC գործակալության, հայտարարել էր, որ Հայաստանի և Ադրբեջանի միջև հաղորդակցությունների ապաշրջափակումը հնարավոր է 2020 թվականի նոյեմբերի 9-ի պայմանավորվածությունների շրջանակում։
«Ուզում եմ ասել, որ ապաշրջափակումը հնարավոր է այն պայմանավորվածությունների շրջանակներում, որոնք ձեռք են բերվել երեք պետությունների (Հայաստանի, Ադրբեջանի և Ռուսաստանի՝ խմբ.) ղեկավարների կողմից և որոնք իրենց արտացոլումն են գտել 2020 թվականի նոյեմբերի 9-ի համատեղ հայտարարության մեջ։ Ինչպես գիտեք, Ռուսաստանը պատրաստ է միշտ միանալ այս գործընթացին և պատրաստ է այստեղ օգնել՝ ելնելով Հայաստանի ինքնիշխանության, տարածքային ամբողջականության և իրավասության սկզբունքներից», — նշել է փոխվաչրապետը։
Ըստ Ադրբեջանի ԱԳՆ խոսնակի՝ համաձայնագրի նախագիծը ստորագրելու համար Հայաստանը նախ պետք է համապատասխան փոփոխություններ կատարի իր Սահմանադրության մեջ։