Ինչքան շատ մեդալ, այդքան՝ լավ․ բռնցքամարտի հավաքականները պատրաստվում են կարևոր ստուգատեսի 

Բռնցքամարտի Հայաստանի մինչև 22 տարեկանների ազգային հավաքականները Եվրոպայի առաջնությունից առաջ մարզում է անցկացրել «Օլիմպավանում»։

Կարեն Աղամալյանի գլխավորած հավաքականները նախապատրաստվում են Բուլղարիայի մայրաքաղաք Սոֆիայում սպասվող մինչև 22 տարեկանների Եվրոպայի առաջնությանը։

Արդեն տեղեկացրել ենք, որ հայտնի են նաև տղամարդկանց և կանանց հավաքականների կազմերը։

Տղամարդկանց հավաքականի գլխավոր մարզիչ Կարեն Աղամալյանը գնահատել է թիմի մարզավիճակն ու մարզական հավաքը՝ խոսելով նաև նպատակներից․

Սա մեր երկրորդ մարզահավաքն է, լավ մարզահավաք ենք անցկացրել։ Ունենք 10 օր ժամանակ մրցաշարի համար։ Մենք և՛ ունենք ժամանակ, և՛ չունենք։ Ինչ-որ պետք է այսօրվա համար, հասել են դրան, բայց հիմա աշխատում ենք արագության ու դիպուկության վրա։ Ինչքան շատ մեդալ, այդքան՝ լավ։

Խոսելով հավաքականի կազմի մասին՝ Աղամալյանը կարևորեց, որ շատերն անգամ մեծահասակների մրցաշարերի են մասնակցել․

Գրեթե ամբողջ թիմը մասնակցել է մեծահասակների մրցաշարերի։ Տղաները մասնակցել են ու նաև մեդալակիրներ են դարձել։ Նաև երկու նորեկ աղջիկ ունենք։

Նախորդ տարվա մինչև 22 տարեկանների Եվրոպայի չեմպիոն Էլիդա Քոչարյանը ևս այս տարի մասնակցելու է մրցաշարին։ Հայ մարզուհին խոստանում է կրկին ոսկի նվաճել․

Ամեն ինչ անելու եմ, որ մեկ անգամ ևս ոսկով վերադառնամ հայրենիք ու ամեն ձեւ կպայքարեմ դրա համար։ Առաջիկա նպատակս Եվրոպայի առաջնությունն է։ Չեմ ցանկանում ժամանակից առաջ անցնել, մեկ շաբաթից մեկնում ենք, սակայն յուրաքանչյուր մարզիկի համար կարևորը Օլիմպիական մեդալն է։

Ռուսլան Ասլիկյանը ևս մեկնում է մրցաշարին՝ պաշտպանելու չեմպիոնությունը․

Այս մրցաշարում նպատակը չեմպիոնությունը պահպանելն է, լավ մենամարտեր անցկացնելն ու հաղթելը։ Օր օրի մարզավիճակ եմ ձեռք բերում, մնացածը մրցաշարը ցույց կտա։

Հիշեցնենք, որ բռնցքամարտի մինչև 22 տարեկանների Եվրոպայի առաջնությունը Բուլղարիայի մայրաքաղաք Սոֆիայում տեղի կունենա հոկտեմբերի 8-ից 21-ը։

Լուսանկարներ մարզումից․