ՀՖՖ նախագահի հայտարարության հետքերով
Արմեն Մելիքբեկյանը հոկտեմբերի 21-ին հայտարարությամբ հանդես եկավ։ Նա նշեց, որ ՀՖՖ ռազմավարության ծրագրերը չեն կատարվել։ Նախագահը անդրադարձավ հիմնական պատճառներին․
Ընտրվելուցս ընդամենը 2 ամիս անց երկար ժամանակով ամբողջ աշխարհն ուղղակի անշարժացավ կորոնավիրուսի պատճառով, իսկ հետո սկսվեց 44-օրյա պատերազմը՝ իր ծանրագույն հետևանքներով մեր երկրի համար: 2022-ին սկսվեց հակամարտությունն Ուկրաինայում, որն ամբողջությամբ ձևափոխել է համաշխարհային գրեթե բոլոր իրողությունները՝ ֆուտբոլի դեպքում խնդիր դարձնելով անգամ թիմերի տեղաշարժը։ Արտարժույթի շուկայի ձևափոխումն էլ լուրջ հարված է հասցրել ֆինանսական կայունությանը, և հայկական ֆուտբոլն այս ընթացքում չի ստացել այն բոլոր ռեսուրսները, ակնկալվող եկամուտները, որոնք կապահովեին ռազմավարական կետերի մեծ մասի իրականացումը։
Արմեն Մելիքբեկյանի հայտարարությունից հետո պետք է նշել, որ կորոնավիրուսային համաճարակի պայմաններում հարևան Վրաստանի հավաքականը կարողացավ Ազգերի լիգայի միջոցով նվաճել Եվրոպայի առաջնության եզրափակիչ փուլի ուղեգիր։ Վրաստանի մինչև 21 տարեկանների հավաքականը Եվրոպայի առաջնության եզրափակիչ փուլ մտնելու փլեյ-օֆֆի մասնակցության իրավունք ստացավ, իսկ Հայաստանի մինչև 21 տարեկանների հավաքականը այդ մրցաշարում վաստակած միավորների քանակով 52 երկրների մեջ 50-րդն էր, խփած գոլերի քանակով՝ 51-րդը։
Ռուս-ուկրաինական պատերազմը ազդեցություն չունեցավ անգամ ուկրաինական ֆուտբոլի վրա։ Թիմերը մասնակցել և մասնակցում են եվրոպական հեղինակավոր մրցաշարերին։ Ուկրաինայի հավաքականն էլ մասնակցեց Եվրոպայի առաջնության եզրափակիչ փուլին։
Առաջնության ներքին հանդիպումների մասին խոսելիս պետք է անդրադառնալ ժամային գրաֆիկին։ Կոնֆերենցիաների լիգայի խմբային փուլի «Նոա» — «Մլադա Բոլեսլավ» խաղի օրը Fastex Հայաստանի Պրեմիեր լիգայի տուրի կենտրոնական հանդիպումն էր։
Հայաստանի հավաքականը ՈւԵՖԱ Ազգերի լիգայի C դիվիզիոնի D խմբում վերջերս պարտություն կրեց Հյուսիսային Մակեդոնիայի հավաքականից (2։0)։ Հանդիպումից հետո թիմի գլխավոր մարզիչ Ալեքսանդր Պետրակովը հեռացվեց պաշտոնից։ FAF-ն էլ շարունակում է պահանջել ՀՖՖ նախագահի հրաժարականը։