Հին ռազմամթերքը տալ, ստանալ նորը․ Հայաստանում ռազմարդյունաբերության մասին օրենքում փոփոխություններ կլինեն
Տեղական ռազմարդյունաբերական կազմակերպություններին պետությունը մտադիր է հանձնել սեփականություն հանդիսացող ռազմամթերքը՝ դրանց արդիականացման, նորոգման կամ փորձարկման նպատակով։ Ազգային ժողովում քննարկվել է «Ռազմարդյունաբերական համալիրի մասին» օրենքում լրացում կատարելու նախագիծը։ Այն վերաբերում է ռազմական տեխնիկայի և զինամթերքի տրամադրմանը մասնավոր ընկերություններին։
Բարձր տեխնոլոգիական արդյունաբերության նախարար Մխիթար Հայրապետյանի խոսքով՝ տարիներ շարունակ նախատեսվում էր իրականացնել դա, ակայն հստակ իրավական կարգավորման բացակայությունը խոչընդոտել է գործընթացի իրականացմանը։
Մայիսին նախատեսում էինք մեկ տասնյակից ավելի ընկերությունների փոխանցել նման զինատեսակներ, սակայն իրավական խոչընդոտները հնարավորություն չէին տալիս գործընթացն ավարտին հասցնել։ Այդ պատճառով նախաձեռնեցինք օրենսդրական փոփոխություն՝ կառավարությանն այդ լիազորությունն օրենսդրորեն տալու նպատակով, – նշել է նախարարը։
Օրենքում լրացումը կառավարությանը թույլ կտա սահմանված ընթացակարգով ու արդյունավետ կերպով ռազմական նշանակության միջոցները փոխանցել ռազմարդյունաբերական ընկերություններին։
Ավելի վաղ Մխիթար Հայրապետյանը նշել էր, որ Պաշտպանության նախարարությունը 52 եռամյա պայմանագիր է կնքել հայկական ռազմարդյունաբերական 27 ընկերությունների հետ, որոնց ընդհանուր բյուջեն կազմում է 171 մլրդ դրամ։